Khandala Crime – खंडाळ्यात शुक्रवारी रात्री बस स्थानक परिसरातील दारु दुकानाबाहेर गौरव राजेंद्र शिंदे (रा. पारगाव, ता. खंडाळा) या युवकावर चाकूने नऊ वेळा वार केल्याने तो गंभीर जखमी झाला. चाकूने वार करणाऱ्या अभिषेक चौधरीला खंडाळा पोलिसांनी ताब्यात घेतले आहे. या घटनेची माहिती कळताच खंडाळा परिसरात खळबळ उडाली.

पोलिसांनी दिलेल्या माहितीनुसार, गौरव शिंदे, ऋषिकेश कांबळे व सद्दाम शेख हे शुक्रवारी (दि.11) दुपारी दीडच्या सुमारास हॉटेलला जेवण करण्यासाठी जाणार होते. मात्र, जाण्याआधीच त्यांच्यात बिल भरण्यावरुन वाद झाल्याने सद्दाम शेख तिथून निघून गेला. यानंतर रात्री खंडाळा बसस्थानक परिसरातील बारमध्ये बसलेला गौरव शिंदे पावणेअकराच्या सुमारास लघुशंकेसाठी बाहेर आला.

यावेळी पाठीमागून आलेल्या युवकाने तू गौरव शिंदे का, असे विचारले. हो म्हणताच ‘तू मला ओळखत नाही का ? मी अभिषेक चौधरी आहे, तू आता सापडला आहेस,’ असे म्हणत अभिषेक चौधरी याने चाकूने गौरवचे दोन्ही खांदे व मांडीवर चाकूने वार केले. यानंतर जखमी अवस्थेत गौरवने आरडाओरडा करत मित्रांच्या दिशेने धाव घेतलेली पाहताच अभिषेकने घटनास्थळावरून पलायन केले.

यानंतर मित्रांच्या मदतीने गौरवला खंडाळ्यातील खासगी रुग्णालयात दाखल करण्यात आले. दुपारी सद्दाम शेख याच्यासोबत झालेल्या भांडणातून त्याचा भाऊ अब्दुल शेख याच्या सांगण्यावरून अभिषेक चौधरी याने धारधार शस्त्राने वार करत जखमी केले आहे. गौरव शिंदे यांने दिलेल्या फिर्यादीवरून अभिषेक चौधरी (रा. घाडगेवाडी, ता.खंडाळा),

अब्दुल शेख व सद्दाम शेख (दोघे रा.बावडा, ता. खंडाळा) या तिघांविरुद्ध खंडाळा पोलीस ठाण्यात गुन्हा दाखल करण्यात आला आहे. अभिषेक चौधरी याला खंडाळा पोलिसांनी ताब्यात घेऊन खंडाळा न्यायालयापुढे उभे केले असता न्यायालयाने मंगळवारपर्यंत (दि.15) तीन दिवसांची पोलीस कोठडी सुनावली आहे. पोलीस अंमलदार धापते तपास करीत आहेत.