Khalapur News- गरीब आणि गरजू कुटुंबांना सवलतीच्या दरात धान्य उपलब्ध व्हावे, यासाठी शासनाकडून रेशन व्यवस्था राबविण्यात येते. मात्र, खालापूर तालुक्यातील कुंभीवली येथील रेशन दुकानात वितरित करण्यात आलेल्या गव्हामध्ये किडी आढळून आल्याची तक्रार समोर आली आहे. त्यामुळे रेशन कार्डधारकांमध्ये संतापाचे वातावरण निर्माण झाले आहे.

रेशनमधून मिळणाऱ्या गहू आणि तांदळावर अनेक गरीब कुटुंबांचा उदरनिर्वाह अवलंबून असतो. त्यामुळे लाभार्थ्यांना वितरित होणारे धान्य योग्य दर्जाचे आणि वापरण्यास सुरक्षित असणे आवश्यक आहे. मात्र कुंभीवली येथील गव्हामध्ये किडी आणि उंदराच्या लेंड्या आढळल्याची तक्रार करण्यात आल्याने धान्याच्या गुणवत्तेबाबत प्रश्न उपस्थित झाला आहे.

दूषित किंवा खराब धान्य आढळल्यास ते लाभार्थ्यांना वितरित न करता संबंधित यंत्रणेकडे परत करणे अपेक्षित आहे. मात्र संबंधित गहू वितरणासाठी उपलब्ध झाल्याने हा प्रकार गंभीर असल्याचे ग्राहकांचे म्हणणे आहे. धामणी गावातील ग्रामस्थ रोहित लोते यांनी २८ सप्टेंबर रोजी पुरवठा अधिकाऱ्यांची भेट घेऊन या प्रकरणी निवेदन दिले. गव्हामध्ये किडी आणि उंदराच्या लेंड्या आढळून आल्या आहेत.

हे धान्य नागरिकांच्या वापरासाठी वितरित केले जात असल्याने नागरिकांच्या आरोग्याच्या दृष्टीने ही बाब चिंताजनक आहे, असे निवेदनात नमूद करण्यात आले आहे. संबंधित गव्हाची तपासणी करून त्याचा दर्जा आणि सुरक्षितता तपासावी. तसेच संबंधित रेशन दुकानात उपलब्ध असलेल्या उर्वरित धान्याचीही पाहणी करावी. तपासणीत दोष आढळल्यास आवश्यक ती कारवाई करावी, अशी मागणी लोते यांनी केली आहे.

दुकानदाराला नोटीस
नागरिकांच्‍या तक्रारीची दखल घेत पुरवठा विभागाने कुंभीवली येथील रेशन दुकानदाराला नोटीस बजावली आहे. तसेच नवीन धान्य वितरण करण्याच्या सूचना देण्यात आल्याचे पुरवठा विभागाने स्पष्ट केले आहे. दोष आढळल्यास संबंधितांवर कारवाई करावी आणि भविष्यात अशा प्रकारची पुनरावृत्ती होऊ नये, यासाठी रेशन धान्याच्या गुणवत्तेवर काटेकोर देखरेख ठेवावी, अशी मागणी नागरिकांकडून होत आहे.

“शासनाकडून रेशन दुकानात आलेल्या धान्यामध्ये कचरा, खराब वस्तू किंवा खराब धान्य आढळल्यास ते ग्राहकांना वितरित करू नये. संबंधित धान्य गोडाऊनमध्ये जमा करून नवीन धान्य घेण्याच्या सूचना सर्व दुकानदारांना देण्यात आल्या आहेत.”
– मनोज पवार, पुरवठा अधिकारी, खालापूर