Gold Silver Price :  गेल्या काही महिन्यांपासून जागतिक घडामोडींमुळे सोन्या-चांदीच्या दरात सातत्याने चढ-उतार पाहायला मिळत आहेत. मात्र, आता ग्राहकांसाठी दिलासादायक बातमी समोर आली आहे. गेल्या 24 तासांत सोन्याच्या दरात तब्बल 3,500 रुपयांची, तर चांदीच्या दरात 7,000 रुपयांची मोठी घसरण झाली आहे.

अमेरिका आणि चीन या दोन प्रमुख आर्थिक महासत्तांमध्ये गेल्या काही दिवसांपासून टॅरिफ वॉरमुळे तणावाचे वातावरण होते. मात्र, दोन्ही देशांच्या राष्ट्राध्यक्षांच्या बैठकीनंतर आर्थिक करार झाला. या घडामोडींचा परिणाम जागतिक बाजारपेठांवर दिसून येत असून, त्याचा फटका सोने आणि चांदीच्या दरांनाही बसला आहे.

मागील महिनाभरापासून जीएसटी वगळता सोन्याचा दर 1.50 लाख रुपयांच्या पुढे होता. त्यामुळे आगामी काळात सोन्याच्या दरात आणखी वाढ होण्याची शक्यता व्यक्त केली जात होती. मात्र, काल 1 लाख 51 हजार 500 रुपयांवर असलेला सोन्याचा दर आज थेट 1 लाख 48 हजार रुपयांपर्यंत घसरला आहे. दुसरीकडे, काल 2 लाख 32 हजार रुपये प्रति किलो असलेली चांदी आज 2 लाख 25 हजार रुपये प्रति किलोवर आली आहे. 

सुवर्ण व्यावसायिक सागर भंगाळे यांनी सांगितले की, अमेरिका आणि चीनदरम्यान झालेल्या आर्थिक करारामुळे आंतरराष्ट्रीय बाजारात दबाव निर्माण झाला असून, त्याचा परिणाम स्थानिक बाजारातही दिसत आहे. अचानक झालेल्या या घसरणीमुळे सराफा बाजारातील खरेदी वाढण्याची शक्यता आहे.

दर कमी झाल्याने ग्राहकांमध्येही उत्साहाचे वातावरण आहे. ग्राहक सचिन चौधरी यांनी सांगितले की, गेल्या काही दिवसांपासून सोन्याचे दर मोठ्या प्रमाणात वाढल्याने खरेदी करणे सर्वसामान्यांच्या आवाक्याबाहेर गेले होते. आता दरात अचानक घसरण झाल्याने दिलासा मिळाला असून, योग्य वेळ साधून खरेदी करण्यासाठी बाजारात आलो आहोत.

दरम्यान, लग्नसराई आणि आगामी सण-उत्सवांच्या पार्श्वभूमीवर सोन्या-चांदीच्या दरातील या घसरणीचा फायदा घेण्यासाठी ग्राहक सराफा बाजाराकडे वळत आहेत. त्यामुळे आगामी काळात बाजारातील खरेदीला आणखी वेग येण्याची शक्यता व्यक्त केली जात आहे. Gold Silver Price :