प्रभात वृत्तसेवा खालापूर – ऑनलाइन जुगार आणि शेअर बाजारातील गुंतवणुकीत पैसे गमावल्याने परतफेडीसाठी चोरीची घटना समोर आली आहे. वडिलांचे सेवानिवृत्तीचे पैसे शेअर बाजारात गमावलेल्या एका तरुण इंजिनियरने ते पैसे परत मिळवण्यासाठी चोरीचा मार्ग अवलंबला. या तरुणाने एका महिलेच्या गळ्यातील ३५ हजार रुपयांचे सोन्याचे मंगळसूत्र चोरले.ही घटना मंगळवारी (दि. २१) सकाळी घडली. मोठे वेणगाव येथील एक महिला मौजे घोडीवली परिसरातील नावढे घोडीवली रस्त्यावरून जात असताना, मोटरसायकलवरून आलेल्या तरुणाने तिच्या गळ्यातील सोन्याचे मंगळसूत्र खेचून पळ काढला. या घटनेनंतर महिलेने तत्काळ खालापूर पोलीस ठाण्यात तक्रार दाखल केली.तक्रारीनंतर पोलीस निरीक्षक सचिन पवार यांच्या मार्गदर्शनाखाली पोलीस उपनिरीक्षक अशोक जगताप यांच्या पथकाने तपास सुरू केला. सीसीटीव्ही फुटेजच्या आधारे संशयिताचा शोध घेण्यात आला. आरोपीने अंगावरील शर्ट बदलणे आणि मोटरसायकलची नंबरप्लेट बदलून ओळख टाळण्याचा प्रयत्न केल्याचे उघड झाले. मात्र तांत्रिक तपासाच्या आधारे शनिवारी (दि. २५) मोगलवाडी येथून अटक केली. अटक करण्यात आलेल्या आरोपीचे नाव जयेश देशमुख (वय २४, शिक्षण – इलेक्ट्रिकल डिप्लोमा) असे आहे. चौकशीत त्याने वडिलांचे सेवानिवृत्तीचे पैसे शेअर बाजारात गमावल्याचे आणि ते पैसे परत मिळवण्यासाठी चोरी केली असल्याची कबुली दिली असून आरोपीला न्यायालयाने मंगळवार (दि. २८) पर्यंत पोलीस कोठडी सुनावली आहे. चोरलेले सोन्याचे मंगळसूत्र पोलिसांनी परत केले असून महिलेने खालापूर पोलिसांचे आभार मानले.
