खालापूर – पावसाने ओढ दिल्याने भातशेती संकटात सापडली आहे. हाताशी आलेले पीक पाण्याअभावी करपण्याची भीती निर्माण झाल्याने शेतकरी चिंतेत आहेत. अशा परिस्थितीत खालापूर तालुक्यातील देवन्हावे गावचे शेतकरी सुदाम नलावडे यांनी एक एकरातील भातपीक वाचवण्यासाठी टँकरने पाणी आणून शेतात सोडले आहे. पीक वाचवण्यासाठी अनेक शेतकऱ्यांना आर्थिक भुर्दंड सहन करावा लागत आहे.

खालापूर तालुक्यात मोठ्या प्रमाणावर औद्योगिक कारखाने असल्याने अनेकजण शेतीऐवजी औद्योगिक क्षेत्रात रोजगार किंवा व्यवसायाकडे वळले आहेत. त्यामुळे तालुक्यात शेती करणाऱ्या शेतकऱ्यांची संख्या तुलनेने कमी आहे. शेतीची लागवड, मजुरी आणि खते यांसाठी मोठा खर्च करावा लागतो. अशा परिस्थितीत पावसाने दडी मारल्याने शेतकऱ्यांसमोरील अडचणी आणखी वाढल्या आहेत.

यंदा भातपिकांना आवश्यक असलेल्या काळात पावसाने विश्रांती घेतल्याने पिकांच्या वाढीवर परिणाम होण्याची भीती आहे. विशेषतः भाताच्या दाण्यांत भर पडण्याच्या अवस्थेत पाणी कमी पडल्यास उत्पादन घटण्याचा धोका निर्माण होतो. वर्षभर मेहनत आणि खर्च करून उभे केलेले पीक डोळ्यांसमोर करपण्याची शक्यता असल्याने शेतकरी हवालदिल झाले आहेत. शेतात पाणी पोहोचवण्यासाठी टँकरचा आधार घेणे हा खर्चिक उपाय असला, तरी हाताशी आलेले पीक वाचवण्यासाठी त्यांनी ही धडपड सुरू केली आहे.

पावसाचा खंड कायम राहिल्यास भातपिकांच्या उत्पादनावर परिणाम होण्याची शक्यता आहे. त्यामुळे शेतकऱ्यांना पिकांचे नुकसान टाळण्यासाठी अतिरिक्त खर्च करावा लागत आहे. पावसाअभावी निर्माण झालेल्या परिस्थितीत शेतकऱ्यांना दिलासा मिळण्यासाठी प्रशासनाने आवश्यक उपाययोजनांकडे लक्ष देण्याची गरज व्यक्त होत आहे.

Pune District : चौफुला चौकात फुलविक्रेत्यांचा ठिय्या