KC Veerendra Arrested: कर्नाटकातील काँग्रेसचे आमदार केसी वीरेंद्र उर्फ ‘पप्पी’ यांना प्रवर्तन संचालनालयाने (ईडी) मनी लाँड्रिंग आणि बेकायदा ऑनलाइन सट्टेबाजी प्रकरणात अटक केली आहे. सिक्कीममधील गंगटोक येथे नवीन कॅसिनोच्या व्यवहारासाठी गेले असताना त्यांना ताब्यात घेण्यात आले. ईडीच्या छापेमारीत १२ कोटी रुपये रोख, यात 1 कोटी रुपयांची परदेशी चलने, ६ कोटींचे सोने, १० किलो चांदी आणि चार लग्जरी गाड्या जप्त करण्यात आल्या. याशिवाय, गोव्यातील पाच मोठ्या कॅसिनो आणि अनेक ऑनलाइन सट्टेबाजी वेबसाइट्सशी त्यांचा संबंध असल्याचे समोर आले आहे.

कोण आहेत केसी वीरेंद्र?
कर्नाटकातील चित्तरदुर्ग विधानसभा मतदारसंघाचे काँग्रेस आमदार केसी वीरेंद्र यांना स्थानिक पातळीवर ‘पप्पी’ म्हणून ओळखले जाते. २०२३ च्या निवडणुकीत त्यांनी भाजपच्या जीएच थिप्पारेड्डी यांचा ५०,००० हून अधिक मतांनी पराभव केला. पेशाने शेतकरी असलेले वीरेंद्र यांनी १९९९ मध्ये बी.कॉम. पूर्ण केले आहे. विशेष म्हणजे, ते कन्नड अभिनेते डोड्डन्ना यांचे जावई आहेत.

ईडीच्या छापेमारीत काय सापडले?
ईडीने देशभरातील ३० हून अधिक ठिकाणांवर छापेमारी केली. यात १२ कोटी रुपये रोख (यात १ कोटी विदेशी चलन), ६ कोटींचे सोने, १० किलो चांदी आणि चार लग्जरी गाड्या जप्त करण्यात आल्या. याशिवाय, १७ बँक खाते आणि दोन लॉकर जप्त करून फ्रीज करण्यात आले. गोव्यातील पप्पी’ज कॅसिनो गोल्ड, ओशन रिव्हर्स कॅसिनो, पप्पी’ज कॅसिनो प्राइड, ओशन ७ कॅसिनो आणि बिग डॅडी कॅसिनो या पाच कॅसिनोंवरही छापेमारी करण्यात आली. हे कॅसिनो त्यांच्या सट्टेबाजी नेटवर्कचा भाग असल्याचे समोर आले आहे.

दुबई कनेक्शन आणि टेक कंपन्या
ईडीच्या तपासात असे समोर आले आहे की, केसी वीरेंद्र यांचे भाऊ केसी थिप्पेस्वामी दुबईतून डायमंड सॉफ्टटेक, टीआरएस टेक्नॉलॉजीज आणि प्राइम९ टेक्नॉलॉजीज या तीन टेक कंपन्यांमार्फत कॉल सेंटर आणि गेमिंग नेटवर्क चालवत होते. याशिवाय, त्यांचे भाऊ केसी नागराज आणि पुतण्या प्रुथ्वी एन. राज यांच्या ठिकाणांवरूनही अनेक मालमत्तेची कागदपत्रे आणि आक्षेपार्ह सामग्री जप्त करण्यात आली.

ईडी आता या प्रकरणात आणखी खोलवर तपास करत आहे. ऑनलाइन सट्टेबाजी आणि मनी लाँड्रिंगच्या या जाळ्याचा विस्तार देश-विदेशात असल्याचे संकेत मिळाले आहेत. केसी वीरेंद्र यांच्या अटकेमुळे कर्नाटकातील राजकीय वर्तुळात खळबळ उडाली असून, येत्या काळात या प्रकरणात आणखी खुलासे होण्याची शक्यता आहे.