पुणे (प्रतिनिधी) : कसबा विधानसभा मतदारसंघात महाविकास आघाडी, इंडिया फ्रंट आणि मित्रपक्षांचे काँग्रेसचे उमेदवार रवींद्र धंगेकर यांच्या सध्या झंझावाती पदयात्रा सुरू आहेत. आज सकाळी या मतदारसंघात राष्ट्रवादी काँग्रेस शरदचंद्र पवार पक्षाच्या नेत्या खासदार सुप्रिया सुळे यांची जीप यात्रा झाली. या जीप यात्रेत महाविकास आघाडीचे शेकडो कार्यकर्ते दुचाकींवरून सहभागी झाले होते. या झंझावाती प्रचारामुळे कसबा विधानसभा मतदारसंघातील सगळेच वातावरण धंगेकरमय झाल्याचा अनुभव आला.

शुक्रवारी सकाळी सूर्या हॉस्पिटलपासून जीप यात्रेला प्रारंभ झाला. त्यानंतर ही यात्रा पवळे चौक, कुंभारवाडा, गावकोस मारुती, हमजे खान चौक, अशोक चौक, रामोशी गेट, गोकुळ वस्ताद तालीम, घसेटी पूल या मार्गावर काढण्यात आली.

जीप यात्रेत खा. सुप्रिया सुळे आणि उमेदवार रवींद्र धंगेकर यांच्यासह शहर काँग्रेस अध्यक्ष अरविंद शिंदे, प्रदेश काँग्रेस उपाध्यक्ष मोहन जोशी, प्रदेश काँग्रेस सरचिटणीस अभय छाजेड,राष्ट्रवादी काँग्रेस शरदचंद्र पवार पक्षाचे प्रभारी शहराध्यक्ष अंकुश काकडे, शिवसेना उद्धव बाळासाहेब ठाकरे पक्षाचे शहरप्रमुख संजय मोरे, विशाल धनवडे, राजेंद्र शिंदे, गणेश नलावडे, संदीप गायकवाड इत्यादी सहभागी झाले होते.

या जीप यात्रेचे जागोजागी जोरदार स्वागत करण्यात आले. महाविकास आघाडीच्या सर्व कार्यकर्त्यांनी कसबा विधानसभा मतदारसंघात पोटनिवडणुकीप्रमाणेच एकजूट दाखवून पुन्हा एकदा विजय खेचून आणावा आणि धंगेकर यांना विजयी करावे, असे आवाहन सुळे यांनी केले.