बेंगळुरू  – कर्नाटकात जेडीएस आणि भाजपने जी निवडणूक युती (bjp and jds alliance) केली आहे त्यावर दोन्ही पक्षांत मोठी नाराजी असून या दोन्ही पक्षांतील अनेकांनी आपल्याशी संपर्क साधून ही खदखद व्यक्त केली असल्याचा दावा कर्नाटकचे उपमुख्यमंत्री डीके शिवकुमार (karnataka deputy cm d k shivakumar) यांनी केला आहे. लोकसभा निवडणुकीसाठी कॉंग्रेसच्या उमेदवारांची यादी जानेवारीपूर्वी निश्‍चित होण्याची शक्‍यता असल्याचेही प्रदेश कॉंग्रेस अध्यक्षांनी सूचित केले.

जेडीएस आणि भाजप यांच्यातील युतीमुळे नाराज झालेल्या अनेकांनी कॉंग्रेस मध्ये प्रवेश करण्याचा मनोदय व्यक्त केला आहे. तथापि त्याविषयी मला पक्षाच्या सहकाऱ्यांबरोबर चर्चा करावी लागणार आहे. या चर्चेनंतर मी पुन्हा त्यांच्याशी बोलणार आहे, असे त्यांनी म्हटले आहे. दोन्ही पक्षांतील युती अगदी वरच्या नेत्यांनी निश्‍चीत केली आहे त्यासाठी आमच्याशी कोणीही सल्लामसलत केलेली नाही असेही या नाराज लोकांनी आपल्याला सांगितल्याचे शिवकुमार यांनी नमूद केले.

लोकसभा निवडणुकीच्या कॉंग्रेस पक्षाच्या तयारी बाबत बोलताना ते म्हणाले की, आम्ही प्रत्येक लोकसभा मतदार संघाची जबाबदारी प्रत्येकी एका मंत्र्यांना दिली आहे. येत्या आठ ते दहा दिवसात ते प्रत्येक मतदार संघातील तीन संभाव्य उमेदवारांची यादी आमच्याकडे देतील आणि त्यानंतर आम्हीं पुढील कार्यवाही करू असे ते म्हणाले. आम्ही अंतिम उमेदवार यादी जानेवारीपुर्वीच फायनल करू असेही त्यांनी नमूद केले.