Basit Ali criticized Babar Azam and Mohammad Rizwan : पाकिस्तान क्रिकेट संघाला नुकताच वेस्ट इंडिजविरुद्धच्या वनडे मालिकेत 34 वर्षांनंतर पराभव स्वीकारावा लागला. मालिकेच्या निर्णायक सामन्यात पाकिस्तानची फलंदाजी अत्यंत निराशाजनक राहिली. वेस्ट इंडिजने दिलेल्या 295 धावांच्या लक्ष्याचा पाठलाग करताना पाकिस्तानचा संपूर्ण संघ अवघ्या 92 धावांवर गारद झाला. विशेष म्हणजे कर्णधार मोहम्मद रिझवान आणि बाबर आझम यांना मालिकेत अपेक्षित कामगिरी करता आली नाही. त्यामुळे पाकिस्तानच्या माजी खेळाडूने या दोघांवर टीका केली आहे. बासित अली बाबर-रिझवानवर संतापला – पाकिस्तानचा माजी क्रिकेटपटू बासित अलीने बाबर आणि रिझवानवर ‘गेम प्लॅन’ या कार्यक्रमात सडकून टीका केली. तो म्हणाला, “हे दोघे आपल्या सुरुवातीच्या यशावर जगत आहेत. आता यांच्याकडून फक्त जाहिराती करून घ्या. प्रशिक्षकांचे सल्ले हे फक्त ऐकण्याचे नाटक करतात. यांना इंझमाम-उल-हक, युसूफ किंवा युनूस खान यांच्यासारखा मार्गदर्शक हवा, जो त्यांना सत्य दाखवेल.” बासितने बाबरला मैदानावर अहंकार विसरून खेळण्याचा सल्ला दिला आहे. बाबर-रिझवानची निराशाजनक कामगिरी – वनडे क्रिकेट हा बाबर आझमचा आवडता फॉर्मेट मानला जातो, पण त्याला शेवटचे शतक ऑगस्ट 2023 मध्ये झळकावता आले होते. यंदा 11 सामन्यांत त्याने फक्त 30 च्या सरासरीने 334 धावा केल्या, तर त्याचा स्ट्राइक रेट 78 इतका कमी आहे. दुसरीकडे, रिझवाननेही गेल्या दोन वर्षांत केवळ एक शतक झळकावले आहे. या दोघांच्या सातत्यपूर्ण अपयशामुळे पाकिस्तानच्या चाहत्यांमध्ये नाराजी पसरली आहे. हेही वाचा – Rohit Sharma : विसरभोळा रोहित ! पत्नी आणि सासूबरोबर डान्स करताना स्टेप विसरला अन्… व्हिडिओ व्हायरल वेस्टइंडीजने 1991 नंतर प्रथमच पाकिस्तानविरुद्ध द्विपक्षीय वनडे मालिका जिंकली. यासह, त्यांनी ऑस्ट्रेलिया आणि पाकिस्तानविरुद्ध कसोटी आणि टी-20 मालिकांमध्ये घरच्या मैदानावर सलग पराभवांची मालिका खंडित केली. वेस्टइंडीजने गेल्या आठवड्यात पहिला वनडे सामना पाच गडी राखून गमावला होता. मात्र, दुसऱ्या वनडे सामन्यात त्यांनी पाच गडी राखून विजय मिळवत मालिका बरोबरीत आणली आणि तिसऱ्या सामन्यातही वर्चस्व राखत मालिका खिशात घातली.
