Junnar News- जुन्नर येथील कृष्णाराव मुंडे विद्यालयाच्या वसतिगृहातून 12 वर्षीय शाळकरी मुलगा बेपत्ता झाल्याची घटना 23 सप्टेंबर रोजी घडली. विशेष म्हणजे याच वसतिगृहातून 1 सप्टेंबर रोजी तीन शाळकरी मुले बेपत्ता झाली होती. त्यांचा 26 दिवसांनंतर चाकण येथे शोध लागला होता. एका महिन्यात दोन वेगवेगळ्या घटनांमध्ये चार मुले बेपत्ता झाल्याने वसतिगृहातील विद्यार्थी आणि पालकांमध्ये घबराटीचे वातावरण निर्माण झाले आहे.

अथर्व विश्वास गायकवाड (वय 12, रा. पिंपरवाडी, इंगळून, ता. जुन्नर; सध्या रा. कृष्णाराव मुंडे विद्यालय वसतिगृह, जुन्नर) याला अनोळखी व्यक्तीने फूस लावून पळवून नेल्याची फिर्याद त्याचे आजोबा मनोहर गायकवाड यांनी जुन्नर पोलिस ठाण्यात दिली आहे. अथर्व इयत्ता आठवीत शिकत असून त्याची उंची चार फूट तीन इंच, रंग काळा, चेहरा गोल व बांधा सडपातळ आहे. बेपत्ता होताना त्याने निळा शर्ट व पांढरी पॅन्ट परिधान केली होती. तो मराठी व हिंदी भाषा बोलतो.

दरम्यान, 1 सप्टेंबर रोजी याच वसतिगृहातून तीन शाळकरी मुले बेपत्ता झाली होती. विविध ठिकाणी शोध घेऊनही त्यांचा ठावठिकाणा लागत नव्हता. अखेर 26 सप्टेंबर रोजी चाकण येथे त्यांचा शोध लागला. त्यांना ताब्यात घेऊन पालकांच्या स्वाधीन करण्यात आले. या घटनेनंतर अवघ्या काही दिवसांत पुन्हा 12 वर्षीय मुलगा बेपत्ता झाल्याने वसतिगृहातील विद्यार्थ्यांच्या सुरक्षिततेचा प्रश्न ऐरणीवर आला आहे. या प्रकारामुळे जुन्नर परिसरातही खळबळ उडाली आहे.