John Abraham New Movie: प्रसिद्ध दिग्दर्शक एसएस राजामौली यांचा आगामी चित्रपट ‘एसएसएमबी29’ मागील काही दिवसांपासून चर्चेत आहे. राजामौलींच्या चित्रपटात कोणते कलाकार भूमिका साकारणार याविषयी बरीच चर्चा रंगली आहे. या चित्रपटात अभिनेता महेश बाबू आणि अभिनेत्री प्रियंका चोप्राची प्रमूख भूमिका असल्याचे सांगितले जाते.

या चित्रपटात दाक्षिणात्य अभिनेता पृथ्वीराज सुकुमारनची देखील प्रमुख भूमिका असणार होती. मात्र, आता पृथ्वीराज सुकुमारन या चित्रपटातून बाहेर पडला असून, त्याच्याजागी बॉलिवूड अभिनेता जॉन अब्राहम महत्त्वाची भूमिका साकारणार असल्याचे सांगितले जात आहे.

रिपोर्टनुसार, पृथ्वीराज सुकुमारनच्या जागी आता जॉन अब्राहमची भूमिकेसाठी निवड करण्यात आली आहे. चित्रपटामध्ये जॉन अभिनेत्री प्रियंका चोप्रासोबत स्क्रीन शेअर करताना दिसेल. तसेच, याचे शूटिंग हैदराबादमध्येच होणार आहे. मात्र, चित्रपटाच्या निर्मात्यांकडून अद्याप कोणतीही अधिकृत माहिती देण्यात आलेली नाही.

प्रियंका चोप्रा देखील काही दिवसांपूर्वीच चित्रपटाच्या शूटिंगसाठी हैदराबादमध्ये दाखल झाली आहे. तिने चित्रपटाच्या शूटिंगला सुरुवात करण्याआधी हैदराबादमध्ये चिलकूर बालाजी मंदिर येथे जाऊन दर्शन घेतले. दरम्यान, राजामौलींच्या ‘एसएसएमबी29’ चित्रपटाचे बजेट 1000 कोटी रुपये असल्याचे सांगितले जात आहे. हा चित्रपट दोन भागांमध्ये रिलीज होईल. चित्रपटाचा पहिला भाग वर्ष 2027 आणि दुसरा भाग वर्ष 2029 मध्ये रिलीज होण्याची शक्यता आहे.