Jewellery Shop Robbery – हडपसर परिसरातील मांजरी येथे सराफी व्यावसायिकाला लक्ष्य करत चोरट्यांनी अत्यंत नियोजनबद्ध पद्धतीने मोठा दरोडा टाकला आहे. दुकानाशेजारी असलेल्या खोलीतून दुकानाच्या भिंतीला भगदाड पाडत चोरट्यांनी प्रवेश करून अंदाजे ३५ तोळे सोन्या-चांदीचे दागिने आणि सव्वा किलो चांदी लंपास केली. या धाडसी घरफोडीमुळे सराफा व्यावसायिकांमध्ये खळबळ उडाली आहे. ही घटना म्हसोबा वस्ती, मुंढवा रस्ता येथील आराध्या ज्वेलर्स येथे घडली.

याप्रकरणी मांजरी पोलीस ठाण्यात गुन्हा दाखल झाला आहे. प्राथमिक माहितीनुसार, चोरट्यांनी प्रथम दुकानालगतची खोली गाठली. त्यानंतर भिंतीला मोठे भगदाड पाडून थेट सराफी दुकानात प्रवेश केला. दुकानातील लॉकर आणि दागिन्यांचे कपाट फोडून त्यांनी मोठ्या प्रमाणावर सोन्या-चांदीचे दागिने चोरून नेले. चोरीचा प्रकार सकाळी दुकान उघडल्यानंतर उघडकीस आला. घटनेची माहिती मिळताच हडपसर पोलिसांनी घटनास्थळी धाव घेत पंचनामा केला.

गुन्हे शाखेचे पथक, श्वानपथक आणि फॉरेन्सिक तज्ज्ञांनाही पाचारण करण्यात आले. परिसरातील सीसीटीव्ही फुटेज तपासण्यात येत असून चोरट्यांनी पूर्वनियोजन करून ही चोरी केल्याचा पोलिसांचा प्राथमिक अंदाज आहे. चोरीस गेलेल्या मालाची अचूक किंमत आणि वजनाची पडताळणी सुरू आहे. पोलिसांनी सांगितले की, दुकान असलेल्या सोसायटीने एक नेपाळी रखवालदार दोन महिन्यांपूर्वी कामाला ठेवला होता. त्याची राहाण्याची खोली दुकानाच्या मागेच आहे. याच खोलीतून दुकानाला भगदाड पाडून ही चोरी करण्यात आली. रखवालदार सध्या फरार आहे. सोसायटीकडे त्याचे आधारकार्ड व इतर कोणतीच माहिती नाही. तसेच सीसीटीव्ही फुटेजही अस्पष्ट आहे.