Pune Police – शहराचा झपाट्याने होणारा विस्तार, वाढती लोकसंख्या आणि बदलते गुन्हेगारीचे स्वरूप लक्षात घेऊन पुणे पोलीस आयुक्तालयाने ४० नवीन पोलीस चौक्या सुरू करण्याचा महत्त्वाकांक्षी आराखडा तयार केला आहे. मात्र, अधिकारी वर्गातील रिक्त पदांमुळे या चौक्यांचे कामकाज प्रभावीपणे कसे चालविणार, असा प्रश्न उपस्थित होत आहे. विशेषतः पोलीस उपनिरीक्षक (पीएसआय) पदांवरील तब्बल २११ रिक्त जागांमुळे चौक्यांच्या विस्तारासमोर मनुष्यबळाचे मोठे आव्हान ठाकले आहे.

पुणे शहर पोलीस आयुक्तालयाच्या अखत्यारीत ४५ पोलीस ठाणे आणि ११० चौक्या कार्यरत आहेत. वाढत्या शहराच्या गरजा लक्षात घेऊन प्रत्येक पोलीस ठाण्याच्या हद्दीत किमान तीन चौक्या असाव्यात, या उद्देशाने तीनपेक्षा कमी चौक्या असलेल्या २३ ठाण्यांच्या हद्दीत ४० नवीन चौक्या सुरू करण्याचे नियोजन करण्यात आले आहे. मात्र, त्यासाठी आवश्यक अधिकारी उपलब्ध नसल्याने नियोजनाची अंमलबजावणी अडचणीत येण्याची चिन्हे आहेत.

पोलीस निरीक्षक (पीआय) संवर्गातील १८८ मंजूर पदांपैकी १६, सहाय्यक पोलीस निरीक्षक (एपीआय) संवर्गातील २६४ पदांपैकी १९, तर पोलीस उपनिरीक्षक (पीएसआय) संवर्गातील ५९९ मंजूर पदांपैकी तब्बल २११ पदे रिक्त आहेत. पीएसआय संवर्गातील जवळपास ३५ टक्के पदे रिक्त असल्याने अनेक अधिकाऱ्यांवर अतिरिक्त जबाबदाऱ्या सोपविल्या आहेत. कायदा-सुव्यवस्था, गुन्ह्यांचा तपास, वाहतूक नियोजन, बंदोबस्त, न्यायालयीन कामकाज आणि प्रशासकीय जबाबदाऱ्या सांभाळताना अधिकारी वर्गावर आधीच मोठा ताण आहे. अशा परिस्थितीत नवीन चौक्यांची भर पडल्यास मनुष्यबळाचा तुटवडा आणखी तीव्र होण्याची शक्यता आहे.

भरती प्रक्रिया मंदावली
यंदा अपेक्षेपेक्षा कमी प्रोबेशनरी पीएसआय पुणे पोलीस दलाला मिळाल्याने रिक्त पदे भरण्याची प्रक्रिया मंदावली आहे. त्यामुळे चौक्यांच्या विस्तारासाठी केवळ इमारती उभारणे पुरेसे नसून आवश्यक अधिकारी व कर्मचारी उपलब्ध करून देणेही तितकेच महत्त्वाचे असल्याचे पोलीस वर्तुळातून सांगितले जात आहे. रिक्त पदे लवकर न भरल्यास चौक्यांच्या विस्ताराचा उद्देश साध्य होणे अवघड आहे.