पुणे : हडपसर परिसरातील मांजरी येथे सराफी व्यावसायिकाला लक्ष्य करत चोरट्यांनी अत्यंत नियोजनबद्ध पद्धतीने मोठी घरफोडी केली. शेजारी असलेल्या खोलीतून दुकानाच्या भिंतीला भगदाड पाडत चोरट्यांनी दुकानात प्रवेश करून अंदाजे ३० किलो वजनाचे सोने-चांदीचे दागिने आणि मौल्यवान ऐवज लंपास केला. या धाडसी चोरीमुळे सराफा व्यावसायिकांमध्ये खळबळ उडाली आहे.

प्राथमिक माहितीनुसार, चोरट्यांनी प्रथम दुकानालगतची खोली गाठली. त्यानंतर भिंतीला मोठे भगदाड पाडून थेट सराफी दुकानात प्रवेश केला. दुकानातील लॉकर आणि दागिन्यांचे कपाट फोडून त्यांनी मोठ्या प्रमाणात सोने-चांदीचे दागिने चोरून नेले. चोरीचा प्रकार सकाळी दुकान उघडल्यानंतर उघडकीस आला.

घटनेची माहिती मिळताच हडपसर पोलिसांनी घटनास्थळी धाव घेत पंचनामा केला. गुन्हे शाखेचे पथक, श्वानपथक आणि फॉरेन्सिक तज्ज्ञांनाही पाचारण करण्यात आले. परिसरातील सीसीटीव्ही फुटेज तपासण्यात येत असून चोरट्यांनी पूर्वनियोजन करून ही चोरी केल्याचा पोलिसांचा प्राथमिक अंदाज आहे.

चोरीस गेलेल्या मालाची अचूक किंमत आणि वजनाची पडताळणी सुरू असून प्राथमिक अंदाजानुसार सुमारे ३० किलो वजनाचे सोने-चांदीचे दागिने व अन्य मौल्यवान वस्तू चोरीला गेल्याची माहिती समोर आली आहे. या धाडसी घरफोडीमुळे मांजरी परिसरातील व्यापाऱ्यांमध्ये भीतीचे वातावरण निर्माण झाले असून पोलिसांनी लवकरात लवकर आरोपींना अटक करण्यासाठी विशेष तपास पथके नियुक्त केली आहेत.

 हेही वाचा: 

Anupam Kher : “राम मंदिरातली चोरी क्षुल्लक गोष्ट, मुघलांनी तर…” अनुपम खेर ट्रोलर्सच्या निशाण्यावर