Jahnavi Killekar : टेलिव्हिजन मालिका, मराठी सिनेमे आणि ‘बिग बॉस’सारख्या रिअॅलिटी शोमधून प्रेक्षकांच्या मनात वेगळी ओळख निर्माण करणारी अभिनेत्री ‘जान्हवी किल्लेकर’ आता एका भन्नाट आणि रहस्यमय भूमिकेतून प्रेक्षकांच्या भेटीला येणार आहे.

जान्हवी आगामी ‘मिरांडा वॉर्निंग’ या सस्पेन्स-थ्रिलर सिनेमात महत्त्वाची भूमिका साकारताना दिसणार आहे. विशेष म्हणजे, या सिनेमाची कथा एका फार्महाऊसवर घडलेल्या खुनाच्या घटनेभोवती फिरते.

खून नेमका कोणी केला? या हत्येमागचं कारण काय? आणि सत्याच्या शोधात पुढे कोणकोणती रहस्यं उलगडणार? या प्रश्नांची उत्तरं सिनेमातून मिळणार आहेत. 27 नोव्हेंबर रोजी ‘मिरांडा वॉर्निंग’ प्रेक्षकांच्या भेटीला येणार आहे.

फार्महाऊसवरील एका खुनाने सुरू होणार रहस्याचा खेळ :

‘मिरांडा वॉर्निंग’ची कथा हेरिटेजवाडी नावाच्या फार्महाऊसवर घडलेल्या एका खुनाच्या घटनेपासून सुरू होते. फार्महाऊसवर खून झाल्यानंतर या घटनेचा तपास सुरू होतो आणि त्यातून अनेक धक्कादायक गोष्टी समोर येऊ लागतात.

सत्याचा शोध घेताना तपास यंत्रणेसमोर कोणती आव्हानं उभी राहतात, या प्रकरणामागे नेमकं कोणाचं रहस्य दडलं आहे आणि शेवटपर्यंत प्रेक्षकांना गुंतवून ठेवणारं सत्य काय आहे, याची उत्सुकता सिनेमामुळे निर्माण झाली आहे.

या सिनेमात आदिनाथ कोठारे एका रफटफ आणि दमदार पोलीस अधिकाऱ्याच्या भूमिकेत दिसणार आहे. त्यामुळे एका बाजूला खुनाचं गूढ आणि दुसऱ्या बाजूला त्याचा तपास करणारा पोलीस अधिकारी, अशी थरारक पार्श्वभूमी सिनेमात पाहायला मिळणार आहे.

जान्हवी किल्लेकरची भूमिका ठरणार खास?

जान्हवी किल्लेकरने आजवर विविध भूमिका साकारून स्वतःच्या अभिनयाची वेगळी छाप निर्माण केली आहे. ‘भाग्य दिले तू मला’ या टीव्ही मालिकेतील तिच्या अभिनयाला प्रेक्षकांची पसंती मिळाली.

त्यानंतर ‘सायको रंगा’ सारख्या सिनेमातूनही तिने अभिनयाची वेगळी बाजू दाखवली. ‘बिग बॉस’ या रिअॅलिटी शोमधील सहभागामुळे तिची लोकप्रियता आणखी वाढली.