Jammu & Kashmir Election – जम्मू-काश्‍मीरला नव्या सरकारच्या स्थापनेची प्रतीक्षा आहे. राष्ट्रपती राजवट उठवल्यानंतर मंत्रिमंडळाचा शपथविधी मार्गी लागेल. त्यामुळे जम्मू-काश्‍मीरचे लक्ष ती प्रक्रिया पूर्ण होण्याकडे लागले आहे. नॅशनल कॉन्फरन्सचे नेते उमर अब्दुल्ला जम्मू-काश्‍मीरच्या मुख्यमंत्रिपदाची धुरा पुन्हा सांभाळणार आहेत.

त्यांनी राष्ट्रपती राजवट उठवण्यात आल्यानंतर शपथविधी होणार असल्याचे सूतोवाच केले. जम्मू-काश्‍मीरमध्ये ६ वर्षांपासून राष्ट्रपती राजवट आहे. ती उठवण्याची शिफारस केंद्रीय मंत्रिमंडळाला राष्ट्रपती भवनकडे करावी लागेल.

सार्वजनिक सुट्यांनंतर ती प्रक्रिया सोमवारी पूर्ण होणे अपेक्षित आहे. तसे झाल्यास मंगळवारी तयारी करून बुधवारी आम्ही शपथविधी आयोजित करू शकू, असे उमर पत्रकारांशी बोलताना म्हणाले. जम्मू-काश्‍मीरमध्ये नुकतीच विधानसभा निवडणूक झाली.

त्या निवडणुकीत नॅशनल कॉन्फरन्स, कॉंग्रेस आदी पक्षांचा समावेश असणाऱ्या इंडिया आघाडीची सरशी झाली. त्या आघाडीचे नेतृत्व करणाऱ्या नॅशनल कॉन्फरन्सचे नेते उमर यांचे नाव मुख्यमंत्रिपदासाठी निश्‍चित झाले.

केंद्रशासित प्रदेश म्हणून जम्मू-काश्‍मीरने पहिली विधानसभा निवडणूक अनुभवली. आता तिथे लोकनियुक्त सरकार सतारूढ होण्याचा मार्ग मोकळा झाला आहे.