IPL Betting – देशभरात सुरू असलेल्या आयपीएलच्या जल्लोषासोबतच पिंपरी-चिंचवड शहरात सट्टेबाजांनी आपले जाळे गुपचूप विणण्यास सुरुवात केली आहे. सामन्यागणिक वाढणाऱ्या उत्साहाचा फायदा घेत कोट्यवधी रुपयांची उलाढाल करणारा हा अवैध ‘डिजिटल जुगार’ सक्रिय झाल्याचे चित्र समोर येत आहे. पोलिसांच्या नजरेतून बचाव करण्यासाठी सट्टेबाजांनी यंदा अत्याधुनिक तंत्रज्ञानाचा आधार घेतल्याने या कारवायांवर नियंत्रण ठेवणे अधिकच कठीण बनले आहे. शहरात सट्टेबाजीचे नेटवर्क पुन्हा जोमाने सक्रिय झाले आहे. पूर्वी फोन कॉलवर चालणारा हा व्यवहार आता व्हॉट्सअॅप, टेलिग्राम आणि खास अॅप्सच्या माध्यमातून ‘लाइव्ह’ पद्धतीने केला जात आहे. सामन्यादरम्यान प्रत्येक चेंडूवर ‘रेट’ बदलत असल्याने क्षणाक्षणाला पैशांची देवाण-घेवाण होत असल्याची माहिती सूत्रांनी दिली. या संपूर्ण साखळीत ‘पंटर’ नावाचे मध्यस्थ महत्त्वाची भूमिका बजावत आहेत. हे पंटर ठराविक ठिकाणी भेटून रोख रकमेची देवाण-घेवाण करतात, तर काही ठिकाणी ऑनलाइन व्यवहारांचीही सोय केली जाते. विशेष म्हणजे, कारवाईपासून बचाव करण्यासाठी बनावट कागदपत्रांवर घेतलेली सिमकार्ड, व्हर्च्युअल नंबर आणि एन्क्रिप्टेड अॅप्सचा मोठ्या प्रमाणावर वापर होत आहे. झटपट पैसे कमावण्याच्या मोहात शहरातील तरुणाई आणि काही व्यावसायिक या जाळ्यात ओढले जात असल्याचे चिंताजनक वास्तव समोर येत आहे. कॉलेज परिसर, उच्चभ्रू वसाहती आणि व्यापारी भागांमध्ये ‘सट्टा लाइन’ देणारे छोटे एजंट सक्रिय झाले असून, काही जण लाखो रुपयांची बोली लावत असल्याची चर्चा आहे. आयपीएल सट्टा ( संग्रहित फोटो ) अनेक कुटुंबांचे आर्थिक गणित या सट्ट्यामुळे कोलमडल्याच्या घटनाही अधूनमधून पुढे येत आहेत. दरम्यान, पोलीस प्रशासनाकडून दरवर्षी सट्टेबाजांवर कारवाई होत असली, तरी या व्यवसायामागील मोठे बुकी बहुतांश वेळा शहराबाहेरून सूत्रे हलवत असल्याने त्यांच्यापर्यंत पोहोचणे आव्हानात्मक ठरत आहे. सायबर सेल, गुन्हे शाखा आणि स्थानिक पोलीस यांच्यात समन्वय साधून संयुक्त मोहीम राबवण्याची गरज व्यक्त होत आहे. तज्ज्ञांच्या मते, डिजिटल माध्यमातून चालणाऱ्या सट्टेबाजीचा मागोवा घेण्यासाठी संशयास्पद आर्थिक व्यवहार, आयपी अॅड्रेस आणि ऑनलाइन ट्रॅफिकवर बारकाईने लक्ष ठेवणे आवश्यक आहे. अन्यथा, हा ‘हायटेक जुगार’ शहरात आणखी खोलवर रुजण्याची भीती आहे. आयपीएलच्या नावाखाली सुरू असलेला हा अवैध पैसा खेळ अनेकांचे आर्थिक आणि कौटुंबिक आयुष्य उद्ध्वस्त करत आहे. त्यामुळे नागरिकांनी अशा प्रकारांपासून दूर राहावे आणि संशयास्पद हालचालींची माहिती तात्काळ पोलिसांना द्यावी, असे आवाहन पोलीस प्रशासनाकडून करण्यात आले आहे.
