IPL 2026 Ticket Price hike : आयपीएल 2026 च्या हंगामापूर्वी क्रिकेटप्रेमींसाठी एक निराशाजनक बातमी समोर आली आहे. टॅक्स दरात वाढ झाल्यामुळे आयपीएल सामन्यांच्या तिकिटांच्या किंमतीत वाढ होणार आहे. याचा थेट परिणाम सामान्य प्रेक्षकांच्या खिशावर होणार आहे, जे दरवर्षी स्टेडियममध्ये जाऊन आपल्या आवडत्या खेळाडूंना प्रोत्साहन देण्यासाठी तिकीटं खरेदी करतात.

आयपीएल तिकिटांवरील टॅक्स वाढणार –

ईएसपीएन क्रिकइन्फोच्या अहवालानुसार, आयपीएल तिकिटांवरील टॅक्स आता 28% वरून 40% करण्यात आला आहे. यामुळे तिकिटांच्या किंमतीत लक्षणीय वाढ होईल. उदाहरणार्थ, जर तिकिटाची मूळ किंमत 1000 रुपये असेल, तर आता 28% टॅक्सनंतर 1280 रुपये द्यावे लागत होते. पण नव्या 40% टॅक्सनुसार, त्याच तिकिटासाठी प्रेक्षकांना 1400 रुपये मोजावे लागतील. या टॅक्स वाढीमुळे आयपीएलला आता कॅसिनो आणि रेस क्लबसारख्या व्यवसायांच्या सर्वोच्च टॅक्स स्लॅबमध्ये स्थान देण्यात आले आहे.

आंतरराष्ट्रीय सामन्यांच्या तिकिटांवर टॅक्स कमी –

आंतरराष्ट्रीय क्रिकेट सामने पाहणाऱ्या प्रेक्षकांसाठी मात्र एक दिलासादायक बातमी आहे. आता भारतातील आंतरराष्ट्रीय क्रिकेट सामन्यांच्या तिकिटांवरील 28% जीएसटी टॅक्स कमी करून 18% करण्यात आला आहे. यामुळे आंतरराष्ट्रीय सामने पाहण्यासाठी तिकीटे आता स्वस्त होणार आहेत. यापूर्वी आयपीएल आणि आंतरराष्ट्रीय सामन्यांवर एकसमान 28% टॅक्स लागू होता, परंतु आता सरकारने आंतरराष्ट्रीय सामन्यांना या टॅक्स स्लॅबमधून वगळले आहे.

हेही वाचा – Asia Cup 2025 : आशिया कपसाठी यूएईचा दमदार संघ जाहीर, दोन गेमचेंजर खेळाडूंनी केले पुनरागमन!

प्रेस इन्फॉर्मेशन ब्युरो (PIB) च्या नव्या अधिसूचनेनुसार, वाढीव टॅक्स फक्त आयपीएलसारख्या खेळ आयोजनांवर लागू असेल. यामुळे आंतरराष्ट्रीय क्रिकेट सामने पाहण्यासाठी प्रेक्षकांना कमी खर्च करावा लागेल.

500 रुपयांपेक्षा कमी किंमतीच्या तिकिटांवर टॅक्स नाही –

सध्या मान्यताप्राप्त क्रीडा आयोजनांसाठी 500 रुपयांपेक्षा जास्त किंमतीच्या तिकिटांवर 18% जीएसटी लागतो, तर 500 रुपयांपेक्षा कमी किंमतीची तिकिटे पूर्णपणे टॅक्समुक्त आहेत. आता सरकारच्या नव्या निर्णयामुळे आंतरराष्ट्रीय सामने आणि राज्य सरकारांनी आयोजित केलेल्या स्पर्धांच्या तिकिटांच्या किंमती आणखी कमी होऊ शकतात.

हेही वाचा – Duleep Trophy 2025 : ऋतुराज गायकवाडची झंझावाती खेळी! वेस्ट झोनची सेमीफायनलमध्ये मजबूत पकड

22 सप्टेंबरपासून नवे दर लागू –

उदाहरणार्थ, 1000 रुपये मूळ किंमतीच्या आंतरराष्ट्रीय क्रिकेट सामन्याच्या तिकिटाची किंमत टॅक्ससह सध्या 1280 रुपये आहे. परंतु नव्या टॅक्स नियमांनुसार, याच तिकिटाची किंमत 1180 रुपये होईल, म्हणजेच प्रेक्षकांना 100 रुपयांची बचत होईल. हे नवे दर 22 सप्टेंबर 2025 पासून लागू होतील, जे भारतात होणाऱ्या महिला विश्वचषक स्पर्धेपासून एक आठवडा आधी आहे. या स्पर्धेच्या तिकीट विक्रीला अद्याप सुरुवात झालेली नाही.