International Yoga Day – आंतरराष्ट्रीय योगदिनाच्या पार्श्वभूमीवर रविवारी १२ वा योगदिन साजरा करण्यात आला. यामध्ये शहरातील संस्था, संघटना, शिक्षण संस्था सहभागी झाल्या होत्या. महापालिका, जिल्हा परिषद, शिक्षणसंस्थांमध्ये देखील हा दिवस साजरा करून फिट इंडियाचा संदेश देण्यात आला. पुणे महापालिका आणि जिल्हा प्रशासन यांच्या संयुक्त विद्यमाने आणि जिल्हा क्रीडा अधिकारी, विविध योग संस्था, तसेच संघटना यांच्या सहकार्याने सर परशुराम महाविद्यालयाच्या मैदानावर आयोजित योग दिनामध्ये नागरिकांनी सहभाग घेतला.

या वेळी खासदार प्रा. मेधा कुलकर्णी, आमदार हेमंत रासणे, पुणे महापौर मंजुषा नागपुरे, उपमहापौर परशुराम वाडेकर, अतिरिक्त आयुक्त ओमप्रकाश दिवटे, निवासी उपजिल्हाधिकारी ज्योती कदम, महाराष्ट्र ऑलिम्पिक असोसिएशनचे महासचिव संजय शेटे, जिल्हा क्रीडा अधिकारी जगन्नाथ लकडे, उपायुक्त माधव जगताप, डॉ. संतोष टेंगले, डबल महाराष्ट्र केसरी शिवराज राक्षे आदी उपस्थित होते.

जिल्हा परिषद
निरोगी आणि सशक्त समाजनिर्मितीसाठी योगाचे महत्त्व समजून प्रत्येक नागरिकाने दैनंदिन जीवनात योगाचा अंगीकार करावा, असे आवाहन जिल्हा आरोग्य अधिकारी डॉ. रामचंद्र हंकारे यांनी केले.
या वेळी जिल्हा परिषदेचे मुख्य कार्यकारी अधिकारी गजानन पाटील, पशुसंवर्धन उपायुक्त राजेश वासनिक, जिल्हा आयुष अधिकारी डॉ. मिलिंद चिद्दरवार, जिल्हा कार्यक्रम व्यवस्थापक (आयुष) डॉ. शोएब इनामदार, जिल्हा विस्तार आणि माध्यम अधिकारी कल्पना पंडित उपस्थित होते.

आझम कॅम्पस
महाराष्ट्र कॉस्मोपॉलिटन एज्युकेशन सोसायटी (आझम कॅम्पस) आणि डॉ. पी. ए. इनामदार युनिव्हर्सिटी यांच्या संयुक्त विद्यमाने योग दिन साजरा करण्यात आला. या वेळी सोसायटीच्या अध्यक्ष आबेदा इनामदार, सचिव प्रा. इरफान शेख , डॉ. पी. ए. इनामदार युनिव्हर्सिटी चे कुलगुरू डॉ. एम. ए. लाहोरी, कुलसचिव धनंजय पालणे, आझम स्पोर्ट्स अकादमीचे संचालक डॉ. गुलझार शेख आदी उपस्थित होते.