Inter-religion Marriage – मुलगी दुसर्या धर्माच्या तरुणासोबत पळून जाऊन लग्न केल्याच्या घटनेवरून वाघोली पोलीस ठाण्यात हिंदुत्ववादी संघटनांचे कार्यकर्ते, मुलीचे कुटुंबीय आणि पोलिसांमध्ये बाचाबाची व झटापट झाल्याची घटना घडली. या प्रकाराचा व्हिडिओ सोशल मीडियावर व्हायरल झाला आहे. संबंधित मुलगी सज्ञान असून ती गेल्या दीड वर्षांपासून शेजारी राहणार्या तरुणासोबत प्रेमसंबंधात होती. काही दिवसांपूर्वी ती स्वतःच्या इच्छेने घर सोडून गेली. पोलिसांनी तिला शोधल्यानंतर तिने त्या तरुणासोबत लग्न केल्याचे सांगितले. मुलीच्या आईने तिच्याशी बोलण्याची इच्छा व्यक्त केल्यानंतर पोलिसांनी तिला पोलीस ठाण्यात बोलावले. मात्र आई व नातेवाईकांनी समजावूनही मुलगी आपल्या निर्णयावर ठाम राहिली. तिने लेखी जबाब देत आपण सज्ञान असून स्वतःच्या इच्छेने त्या तरुणासोबत राहणार असल्याचे स्पष्ट केले. तसेच नातेवाईकांकडून जीवाला धोका असल्याची भीतीही व्यक्त केली. या पार्श्वभूमीवर हिंदुत्ववादी संघटनांचे कार्यकर्ते आणि कुटुंबीयांनी पोलीस ठाण्याबाहेर गोंधळ घालत मुलीला त्यांच्या ताब्यात देण्याची मागणी केली. यावेळी पोलिसांवर मदत केल्याचा आरोप करत वाद व झटापट झाली. दरम्यान, पोलिसांनी स्पष्ट केले आहे की संबंधित मुलगी कायदेशीररित्या सज्ञान असून तिला स्वतःचे निर्णय घेण्याचा अधिकार आहे. सोशल मीडियावर फिरणार्या अपूर्ण किंवा दिशाभूल करणार्या माहितीवर विश्वास ठेवू नये, असे आवाहनही पोलिस प्रशासनाने केले आहे. याउलट मुलीच्या कुटुंबीयांनी, मुलगी घरी येण्यास तयार होती; मात्र पोलिसांनीच तिच्यावर दबाव टाकल्याचा आरोप केला आहे. या प्रकरणी पुढील घडामोडींवर सर्वांचे लक्ष लागले आहे.
