नवी दिल्ली – शीना बोरा हत्या प्रकरणातील मुख्य आरोपी इंद्राणी मुखर्जी हिला सर्वोच्च न्यायालयाने आज जामीन मंजूर केला. इंद्राणी मुखर्जी मागील साडे 6 वर्षांपासून तुरुंगात आहे. हा कालावधी खूप मोठा आहे. या प्रकरणाची सुनावणी लवकर संपणार नाही, असे सांगून सर्वोच्च न्यायालयाने इंद्राणी मुखर्जीला जामीन मंजूर केला.

इंद्राणी मुखर्जी 2015 पासून तुरुंगात आहे. शीना बोरा हत्या प्रकरणात 237 साक्षीदारांचे जबाब नोंदवायचे आहेत. आतापर्यंत केवळ 68 साक्षीदारांचे जबाब नोंदवण्यात आले आहेत. त्यामुळे या प्रकरणाची सुनावणी इतक्‍यात संपणार नाही, असे निरीक्षण न्या. एल. नागेश्‍वर राव यांच्या अध्यक्षतेखालील तीन सदस्यीय पीठाने नोंदवले.

इंद्राणी मुखर्जीवर आपल्याच कन्येची हत्या करण्याच्या उद्देशाने अपहरण करण्याचा आरोप आहे. इंद्राणी मुखर्जीचा पती पीटर मुखर्जी हा देखील या प्रकरणात सहआरोपी आहे. पीटर मुखर्जीच्या पूर्व पत्नीपासून झालेला मुलगा राहुल मुखर्जी बरोबर शीना बोरा “लीव्ह इन रिलेशनशीप’मध्ये रहात असल्यामुळे इंद्राणी आणि पीटर यांनी मिळून शीना बोराची हत्या करण्याचा कट केल्याचा या दोघांवर आरोप आहे. मात्र या प्रकरणाच्या स्वरुपावर कोणतेही भाष्य न करता न्यायालयाने केवळ इंद्राणी मुखर्जी गेल्या साडे सहा वर्षांपासून तुरुंगात असल्याची बाब वितारात घेतली. अजून निम्मेही साक्षीदार तपासून झाले नसल्यामुळे हे प्रकरण इतक्‍यात संपणार नाही, असे सांगून जामीन मंजूर केला.

इंद्राणी तुरुंगात असतानाच म्हणजे 2019 मध्येच पीटर मुखर्जी आणि इंद्राणी मुखर्जी यांच्यातील वैवाहिक नाते संपुष्टात आले आहे.