India Women Kabaddi : पहिल्याच कॉमनवेल्थ कबड्डी स्पर्धेत भारतीय महिला संघाचा डंका! युगांडावर ३५-१५ ने मात करत जेतेपदावर कोरलं नाव
India Women Kabaddi : कॉमनवेल्थ कबड्डी चॅम्पियनशिपच्या नवव्या दिवशी झालेल्या अंतिम सामन्यात निधी शर्माच्या नेतृत्वाखाली विश्वविजेत्या भारताने युगांडा महिला संघावर ३५-१५ असा विजय मिळवला.
India Women Clinch Commonwealth Kabaddi Championship 2026 Title : भारतीय महिला कबड्डी संघाने आपल्या जागतिक वर्चस्वाची प्रचिती देत पहिल्यावहिल्या कॉमनवेल्थ कबड्डी चॅम्पियनशिपचे (Commonwealth Kabaddi Championship 2026) जेतेपद दिमाखात पटकावले आहे. अंतिम सामन्यात भारताने युगांडाचा ३५-१५ अशा मोठ्या फरकाने एकतर्फी पराभव केला. या विजयासह भारतीय संघाने संपूर्ण स्पर्धेत एकही सामना न गमावता अपराजित राहत चॅम्पियन बनण्याचा ऐतिहासिक बहुमान मिळवला. अंतिम सामन्यात भारताच्या चढाई आणि पकडीसमोर युगांडाचे खेळाडू पूर्णपणे निष्प्रभ ठरले.
साक्षीची तुफानी चढाई; पहिल्या हाफमध्येच २२-७ ची भक्कम आघाडी –
भारताच्या विजयात स्टार रेडर साक्षी हिने मोलाचे योगदान दिले. तिने १० चढायांमध्ये तब्बल ९ गुण (२ बोनस गुणांसह) वसूल केले; यापैकी ७ गुण तिने एकट्या पहिल्या हाफमध्ये मिळवले. पहिल्या हाफमध्ये १० मिनिटे शिल्लक असताना भारत ७-३ ने आघाडीवर होता. त्यानंतर भारताने जोरदार आक्रमण करत १५-४ अशी आघाडी वाढवली आणि युगांडावर पहिला लोण चढवून मध्यंतरापर्यंत २२-७ अशी भक्कम आघाडी घेतली. पहिल्या हाफमध्ये भारताने एकही चढाई वाया घालवली नाही, तर युगांडाचे सर्व ९ टॅकल प्रयत्न अपयशी ठरले.
अनु, निधी अन् बचावफळीची अभेद्य भिंत –
THE GOLDEN MOMENT FOR WOMEN KABADDI
– Indian Team wins the inaugural Commonwealth Kabaddi Championship! 🇮🇳
WELL DONE, GIRLS!!!!! 🔥🔥🔥 https://t.co/QHtEZeSdBn
— The Khel India (@TheKhelIndia) October 31, 2026
साक्षी व्यतिरिक्त अनुने ६ गुण, तर कर्णधार निधी शर्माने ५ गुणांची भर घातली. बचावफळीत रितू आणि सुमन यांनी प्रत्येकी ४-४ टॅकल पॉईंट्स मिळवत युगांडाच्या आक्रमणाची धार बोथट केली. भारताने सामन्यात एकूण २० रेड पॉईंट्स आणि १० टॅकल पॉईंट्स मिळवले, तसेच युगांडाला दोन वेळा ऑलआऊट केले. युगांडाकडून एकट्या नकायोंगो शिराटने एकाकी झुंज देत ११ गुण मिळवले; मात्र इतर रेडर्सना केवळ ३ गुणच मिळवता आले. दुसऱ्या हाफमध्ये झाल्वांगो जेमिमाने केलेली एकमेव पकड वगळता युगांडाला भारतीय रेडर्सना रोखता आले नाही.
साक्षी ठरली स्पर्धेची हिरो; ६ सामन्यांत ५२ गुण –
🇮🇳 𝐆𝐨𝐥𝐝𝐞𝐧 𝐆𝐥𝐨𝐫𝐲 𝐟𝐨𝐫 𝐈𝐧𝐝𝐢𝐚!🥇🏆
Indian women’s team clinched the title at the inaugural Commonwealth Kabaddi Championship in Ahmedabad.
India secured the gold medal with a convincing 35-15 victory over #Uganda in the final this evening.
With this triumph, the Indian women’s team made history by winning the maiden edition of the championship on home soil.
#CommonwealthKabaddiChampionship #Kabaddi #CommonwealthKabaddi #Gujarat #Ahmedabad
— All India Radio News (@airnewsalerts) October 31, 2026
अंतिम सामन्यातील विजयानंतर साक्षी म्हणाली, “संघाच्या विजयात ९ गुणांचे योगदान देऊ शकल्याचा मला प्रचंड आनंद आहे. सुवर्णपदक जिंकल्यानंतर संपूर्ण संघात जल्लोषाचे वातावरण आहे. अशा आंतरराष्ट्रीय स्पर्धांमुळे युवा खेळाडूंना मोठा अनुभव मिळतो आणि कबड्डीचा जागतिक प्रसार होतो. उत्कृष्ट आयोजनासाठी मी एकेएफआयची (AKFI) आभारी आहे.” साक्षीने संपूर्ण स्पर्धेत ६ सामन्यांत मिळून तब्बल ५२ गुणांची विक्रमी कमाई केली.
अहमदाबादमध्ये भारतीय वाघिणींची विजयी घोडदौड –
भारतीय महिला संघाने अहमदाबादमधील संपूर्ण मोहिमेत सर्व ६ सामने जिंकून जेतेपदावर नाव कोरले. साखळी फेरीत मलेशियाचा ७३-१३, सिंगापूरचा ३२-१६, युगांडाचा ४१-१८ आणि नायजेरियाचा ३८-१० असा पराभव करत भारताने अ गटात अव्वल स्थान पटकावले होते. त्यानंतर उपांत्य फेरीत श्रीलंकेचा ३९-१४ असा धुव्वा उडवला आणि अंतिम फेरीत युगांडाला पुन्हा धूळ चारून मानाचे सुवर्णपदक स्वतःच्या नावे केले.
