Economic Survey :  केंद्रीय अर्थमंत्री निर्मला सीतारमन या देशाचा अर्थसंकल्प उद्या (1 फेब्रुवारी) मांडणार आहेत. या अर्थसंकल्पात शेतकरी, तरूण आणि महिलांसाठी अनेक घोषणा केल्या जाऊ शकतात. आजपासून अर्थसंकल्पीय अधिवेशनाला सुरुवात झाली असून, राष्ट्रपती द्रौपदी मुर्मू यांनी दोन्ही सभागृहांना संबोधित केले.

अर्थमंत्री निर्मला सीतारमन यांनी अर्थसंकल्पापूर्वी आर्थिक सर्वेक्षण 2024-25 देखील सादर केले. सर्वेक्षणानुसार, पुढील आर्थिक वर्षासाठी भारतीय अर्थव्यवस्थेचा वृद्धी दर 6.3 टक्के ते 6.8 टक्क्यांदरम्यान राहण्याचा अंदाज आहे. सर्वेक्षणानुसार भारताला 2047 पर्यंत विकसित देश बनायचे असल्यास वृद्धी दर 8 टक्के असणे गरजेचे आहे.

आर्थिक सर्वेक्षणानुसार, किरकोळ महागाईमध्ये आर्थिक वर्ष 2024 मधील 5.4 टक्क्यांवरून एप्रिल-डिसेंबर 2024 मध्ये 4.9 टक्क्यांपर्यंत घसरण झाली आहे. त्याच वेळी, रोजगारातही सुधारणा दिसून आली. 2017-18 (जुलै-जून) मध्ये बेरोजगारीचा दर 6 टक्क्यांवरून 2023-24 (जुलै-जून) मध्ये 3.2 टक्क्यांपर्यंत घसरला आहे. या आर्थिक वर्षाच्या चौथ्या तिमाहीमध्ये महागाई आणखी कमी होईल असा अंदाज आहे.

याशिवाय, जीएसटी जीएसटी संकलनात 11 टक्क्यांनी वाढ होऊन, संकलन 10.62 लाख कोटी रुपयांपर्यंत पोहोचण्याची शक्यता आहे. भारताचा परकीय चलन साठा जानेवारी 204 अखेर 616.7 अब्ज अमेरिकन डॉलर्सवरून सप्टेंबर 2024 मध्ये 704.9 अब्ज अमेरिकन डॉलर्सपर्यंत वाढला. 3 जानेवारी 2025 रोजी 634.6 अब्ज अमेरिकन डॉलर्स एवढा होता.