LPG Services : होर्मुझ सामुद्रधुनी बंद झाल्यामुळे निर्माण झालेल्या ऊर्जा पुरवठ्यातील अडथळ्यांचा भारताने यशस्वीपणे सामना केला. देशांतर्गत एलपीजी उत्पादन वाढवण्यासह आयातीचे स्रोत २७ वरून ४१ देशांपर्यंत विस्तारल्यामुळे स्वयंपाकाच्या गॅसचा पुरवठा सुरळीत ठेवता आला, अशी माहिती केंद्रीय पेट्रोलियम मंत्री हरदीप सिंग पुरी यांनी मंगळवारी दिली.

२९ व्या ‘एनर्जी टेक्नॉलॉजी अँड इनोव्हेशन मीट’मध्ये बोलताना पुरी यांनी सांगितले की, भारताने एलपीजीचे दररोजचे देशांतर्गत उत्पादन ३४,००० मेट्रिक टनांवरून ५५,००० मेट्रिक टनांपर्यंत वाढवले. अमेरिका, अल्जेरिया आणि इतर पुरवठादारांकडून आयात वाढवून आखाती देशांतील पुरवठ्यातील व्यत्ययाची भरपाई करण्यात आली.

भारताच्या एलपीजी आयात धोरणात विविधता आणल्यामुळे ऊर्जा सुरक्षेला बळ मिळाले. जानेवारीत झालेल्या करारानुसार अमेरिकेकडून आयात सुरू झाली. त्यांनी अमेरिकेचा भारताच्या एकूण एलपीजी गरजेतील वाटा ६७ टक्के असल्याचे पुरी यांनी सांगितले.

दरम्यान, संकटाच्या काळात एलपीजी टंचाईबाबत पसरलेल्या अफवांमुळे सिलिंडर बुकिंगमध्ये मोठी वाढ झाल्याचे पुरी यांनी नमूद केले. दररोजची सरासरी मागणी ५१ ते ५२ लाख सिलिंडर असताना बुकिंग सुमारे ९० लाखांवर पोहोचले. ही वास्तविक मागणी नसून घबराटीतून निर्माण झालेली मागणी असल्याचे त्यांनी स्पष्ट केले.

साठेबाजी आणि गैरवापर रोखण्यासाठी केंद्र सरकारने राज्यांना सूचना दिल्या. प्रशासनाने केलेल्या छाप्यांमध्ये काही सिलिंडर जप्त केल्यानंतर बुकिंगमध्ये घट झाली. देशात एलपीजी सिलिंडर पूर्णपणे अनुपलब्ध होण्याची परिस्थिती कधीही निर्माण झाली नव्हती, असे केंद्रीय मंत्री हरदीप सिंग पुरी यांनी स्पष्ट केले. ऊर्जा संकटाचा सामना करण्यासाठी पूर्वतयारी, पुरवठा साखळीतील समन्वय आणि मुत्सद्देगिरी महत्त्वाची असल्याचेही त्यांनी नमूद केले.