– विजय शिंदे
Indapur Politics- स्थानिक स्वराज्य संस्थांच्या राजकारणात पुणे जिल्ह्यात राष्ट्रवादी काँग्रेसने मिळवलेले यश, तर दुसरीकडे विरोधकांमधील विस्कळीतपणा, यामुळे इंदापूरच्या राजकारणात सत्ताधाऱ्यांचे पारडे जड असल्याचे चित्र दिसत आहे. पंचायत समितीवरील सत्ता, नगरपरिषदेतील यश आणि जिल्हा परिषदेच्या तालुक्यातील आठपैकी आठ जागांवरील विजय यामुळे राष्ट्रवादीच्या वर्चस्वाची चर्चा सुरू असली, तरी सक्षम विरोधी नेतृत्वाचा अभाव हा तालुक्याच्या राजकारणातील महत्त्वाचा मुद्दा बनला आहे.

या राजकीय वर्चस्वाला प्रभावी आव्हान देणारी विरोधकांची एकजूट सध्या दिसून येत नसल्याची चर्चा नागरिकांमध्ये आहे. महाविकास आघाडीतील प्रमुख नेते आणि माजी मंत्री हर्षवर्धन पाटील यांनी स्थानिक पातळीवर कृषिमंत्री दत्तात्रय भरणे यांच्याशी जुळवून घेतल्याचे चित्र आहे. त्यामुळे विरोधकांकडून सत्ताधाऱ्यांना मिळणारे आव्हान मर्यादित होत असल्याचे राजकीय जाणकारांचे मत आहे.

खासदार सुप्रिया सुळे यांच्या माध्यमातूनही राष्ट्रवादी काँग्रेस शरदचंद्र पवार पक्षाला इंदापुरात अपेक्षित जनाधार मिळवण्यात मर्यादा येत असल्याचे चित्र दिसते. विकासकामांसाठीचा निधी, जिल्हा नियोजन समितीतील कामे आणि प्रशासकीय स्तरावरील प्रलंबित प्रस्ताव यांभोवती तालुक्यातील राजकीय समीकरणे फिरताना दिसतात. सत्तेच्या माध्यमातून विकासकामे मार्गी लावण्याची अपेक्षा असल्याने काही विरोधी नेतेही सत्ताधाऱ्यांच्या जवळ जाण्याचा प्रयत्न करतात.

परिणामी, विरोधकांची स्वतंत्र राजकीय भूमिका आणि आक्रमकता कमी होत असल्याची चर्चा आहे. आगामी लोकसभा आणि विधानसभा निवडणुकांपर्यंत पाटील, भरणे आणि जगदाळे यांच्यातील राजकीय समन्वय कायम राहिला, तसेच प्रवीण माने आणि प्रदीप गारटकर यांनी महायुतीच्या चौकटीतच राजकारण केले, तर इंदापूरमध्ये सत्ताधाऱ्यांना आव्हान देणे विरोधकांसाठी कठीण ठरू शकते.

सहकारी संस्थांच्या निवडणुकांकडे लक्ष
इंदापूर तालुक्यात आगामी काळात पुणे जिल्हा मध्यवर्ती सहकारी बँक, कर्मयोगी शंकरराव पाटील सहकारी साखर कारखाना आणि कृषी उत्पन्न बाजार समितीच्या निवडणुका महत्त्वाच्या ठरणार आहेत. दत्तात्रय भरणे, हर्षवर्धन पाटील आणि आप्पासाहेब जगदाळे यांच्यातील राजकीय समीकरणे कायम राहिल्यास या निवडणुकांमध्ये सत्ताधारी गटाचे पारडे जड राहण्याची शक्यता वर्तवली जात आहे. मात्र, निवडणुकांतील प्रत्यक्ष चित्र हे उमेदवारांची निवड, स्थानिक आघाड्या आणि बदलत्या राजकीय परिस्थितीवर अवलंबून असेल.

भाजपचे नेतृत्व, पण विरोधाची धार कमी
विधानसभेची निवडणूक अपक्ष म्हणून लढवलेले सोनाई परिवाराचे आणि पुणे जिल्हा परिषदेचे माजी सभापती प्रवीण माने, तसेच राष्ट्रवादी काँग्रेसमधून आलेले प्रदीप गारटकर यांच्यासारखे नेते भाजपमध्ये आहेत. मात्र, राज्यात भाजप आणि राष्ट्रवादी काँग्रेस महायुतीत एकत्र असल्याने स्थानिक राजकारणात सत्ताधाऱ्यांना प्रभावी विरोध करण्याबाबत मर्यादा येत असल्याचे बोलले जाते. काँग्रेसचेही तालुक्यातील राजकीय अस्तित्व तुलनेने मर्यादित असल्याने विरोधकांची ताकद विखुरलेली दिसत आहे.