Dattatray Bharne : सोमेश्वर सहकारी साखर कारखान्याच्या निवडणुकीच्या प्रचार चांगलीच रंगत चढली आहे. अशातच राष्ट्रवादी काँग्रेसचे नेते आणि कृषिमंत्री दत्तात्रय भरणे यांनी जाहीर सभेत केलेल्या एका वक्तव्याची स्थानिक राजकीय वर्तुळात चर्चा रंगली आहे.

“गप्पा मारणारी आणि वहिनी जास्त कानाला लागणारी कार्यकर्ते आता ओळखा,” असे वक्तव्य करत भरणे यांनी अप्रत्यक्षपणे बंडखोरी करून स्वतंत्र पॅनेल उभे करणाऱ्या पुरुषोत्तम जगताप यांच्यावर निशाणा साधल्याची चर्चा आहे.

पुढे बोलताना भरणे म्हणाले “वहिनी नव्या होत्या आता काळजी करू नका आता वहिनीला सगळं समजतयं. आपलं पॅनल १० हजार मतांच्या फरकाने निवडून येईल.” असा विश्वासही दत्तात्रय भरणे यांनी व्यक्त केला. माझ्या राजकारणात दादांचा खूप मोठा वाटा असल्याचे भरणे म्हणाले.

सोमेश्वर कारखान्यात ‘पवार विरुद्ध पवार’ संघर्ष

सोमेश्वर सहकारी साखर कारखान्याच्या निवडणुकीत यंदा पुन्हा एकदा पवार कुटुंबातील राजकीय संघर्ष पाहायला मिळत आहे. या निवडणुकीत तीन पॅनेल आमनेसामने असून, त्यामुळे लढत अधिक चुरशीची होण्याची शक्यता आहे.

जय पवार यांच्या नेतृत्वाखाली सुनेत्रा पवार यांच्या पॅनेलचा प्रचार सुरू आहे. दुसरीकडे, युगेंद्र पवार यांच्या नेतृत्वाखाली शरद पवार समर्थकांचे पॅनेल निवडणुकीच्या रिंगणात आहे. तर बंडखोरी करत पुरुषोत्तम जगताप यांनी स्वतंत्र पॅनेल उभे केले आहे. त्यामुळे मतांचे विभाजन कोणाच्या पथ्यावर पडणार, याकडे सर्वांचे लक्ष लागले आहे.

पैसे वाटपाच्या आरोपांमुळे निवडणुकीत नवा वाद

सोमेश्वर साखर कारखान्याच्या २१ जागांसाठी ही निवडणूक होत आहे. निवडणुकीदरम्यान पैसे वाटप झाल्याचा आरोप करण्यात आल्याने राजकीय वातावरण आणखी तापले आहे. अजित पवार यांच्या नेतृत्वाखालील राष्ट्रवादी काँग्रेस पक्षाच्या गटाकडून पैसे वाटप झाल्याचा आरोप पुरुषोत्तम जगताप यांच्या कार्यकर्त्यांनी केल्याचे सांगितले जात आहे. या प्रकरणाची पोलिसांकडून चौकशी सुरू असल्याची माहिती आहे.

Abhijit Dipke : “जिंदगी जीने के दो ही तरीके होते है…”; आंदोलनापूर्वी अभिजीत दिपकेंचा महत्वाचा संदेश, असं म्हणण्याचं कारण काय?