IND vs AUS Virat Rohit Partnership record in ODI : भारत आणि ऑस्ट्रेलिया यांच्यात 19 ऑक्टोबरपासून तीन सामन्यांची वनडे मालिका सुरू होत आहे. या मालिकेत भारतीय संघाचा कर्णधार रोहित शर्मा आणि माजी कर्णधार विराट कोहली यांच्याकडे वनडे क्रिकेटमध्ये ऐतिहासिक कामगिरी करण्याची सुवर्णसंधी आहे. या दोघांनी आतापर्यंत वनडे क्रिकेटमध्ये अनेकदा भारताला विजय मिळवून देण्यात मोलाचा वाटा उचलला आहे. त्यांच्या भागीदारीचा विक्रमही प्रभावी आहे.

पाचव्या स्थानासाठी फक्त 95 धावांची गरज –

रोहित आणि विराट यांनी आतापर्यंत वनडे क्रिकेटमध्ये 99 डावांत एकत्र फलंदाजी करत 5315 धावा जोडल्या आहेत. यामध्ये 18 शतकी आणि 17 अर्धशतकी भागीदाऱ्यांचा समावेश आहे. त्यांची सर्वोच्च भागीदारी 246 धावांची आहे. सध्या वनडे क्रिकेटमधील सर्वाधिक धावा करणाऱ्या जोड्यांच्या यादीत ते सहाव्या स्थानावर आहेत.

आगामी मालिकेत जर या दोघांनी एकत्रितपणे 95 किंवा त्याहून अधिक धावा जोडल्या, तर ते ऑस्ट्रेलियाच्या दिग्गज जोडी अ‍ॅडम गिलख्रिस्ट आणि मॅथ्यू हेडन यांना मागे टाकून पाचव्या स्थानावर पोहोचतील. गिलख्रिस्ट-हेडन जोडीने 5409 धावांची भागीदारी केली आहे. ही मालिका रोहित आणि विराट यांच्यासाठी वैयक्तिक विक्रमासोबतच संघाच्या विजयासाठीही निर्णायक ठरू शकते.

हेही वाचा – IND vs AUS : किंग कोहलीसमोर हिटमॅन नतमस्तक! रोहितने सलाम करताच विराटचे स्मितहास्य, पाहा VIDEO

ऑस्ट्रेलियातील प्रभावी कामगिरी –

ऑस्ट्रेलियात वनडे क्रिकेटमध्ये रोहित आणि कोहली यांनी नेहमीच आपली छाप पाडली आहे. रोहित शर्माने 30 सामन्यांत 53.12 च्या सरासरीने 1328 धावा केल्या आहेत, तर विराट कोहलीने 29 सामन्यांत 51.04 च्या सरासरीने 1327 धावा जमवल्या आहेत. दोघांनीही ऑस्ट्रेलियात प्रत्येकी 5 शतके ठोकली आहेत. त्यांचा हा अनुभव आणि क्षमता भारतीय संघाला या आव्हानात्मक दौऱ्यावर बळ प्रदान करेल.

हेही वाचा – IND vs AUS : ‘जर कोणाच्या बापात दम असेल, तर रोखून दाखवा…’, रोहित-विराटच्या भविष्याबाबत माजी खेळाडूच थेट आव्हान

प्रेक्षकांच्या नजरा भागीदारीवर –

या मालिकेत रोहित आणि कोहली यांच्या भागीदारीवर प्रेक्षकांचे विशेष लक्ष असेल. त्यांचा ताळमेळ आणि फॉर्म ऑस्ट्रेलियासारख्या मजबूत संघाविरुद्ध भारतासाठी मोठी ताकद ठरू शकतो. ही मालिका त्यांच्यासाठी केवळ विक्रम रचण्याचीच नव्हे, तर भारतीय संघाला विजयाच्या जवळ नेण्याचीही संधी आहे.