IND vs AUS 4th Test : भारत आणि ऑस्ट्रेलिया यांच्यातील पाच कसोटी सामन्यांच्या मालिकेतील चौथा सामना गुरुवारपासून मेलबर्न क्रिकेट मैदानावर खेळवला जाणार आहे. पर्थ कसोटी भारताने जिंकली, तर ऑस्ट्रेलियाने ॲडलेडमध्ये पुनरागमन करत गुलाबी चेंडू कसोटी जिंकली. तिसरा सामना पावसामुळे अनिर्णित राहिला.

मालिकेच्या दृष्टीने चौथा सामना दोन्ही संघांसाठी अत्यंत महत्त्वाचा असणार आहे. मेलबर्न क्रिकेट ग्राउंडवर ऑस्ट्रेलियाचे जास्त वर्चस्व राहिले आहे आणि गेल्या काही वर्षातील रेकॉर्ड पाहिल्यास मेलबर्नमध्ये ऑस्ट्रेलियन संघाने विरोधी संघावर वर्चस्व गाजवले आहे.

पॅट कमिन्सच्या नेतृत्वाखालील ऑस्ट्रेलिया संघाने ॲडलेड आणि ब्रिस्बेनमध्ये भारतावर दबाव आणला होता आणि बहुतेक सामन्यात ते पुढे होते. मात्र, भारतीय संघाने ब्रिस्बेनमध्ये जोरदार पुनरागमन केले आणि दुसऱ्या डावात 100 धावांच्या आत ऑस्ट्रेलियाच्या सात फलंदाजांना माघारी धाडलं होतं. मात्र, मेलबर्नमध्ये रोहितच्या संघासाठी अडचणी वाढणार आहेत. त्याचबरोबर चौथ्या सामन्यापूर्वी अनेक वादांनीही भारतीय पथकात खळबळ उडवून दिली आहे. विराट कोहलीने ऑस्ट्रेलियन मीडियाला विमानतळावर फोटो काढण्यापासून रोखणे, जडेजाने इंग्लिश रिपोर्टरला प्रतिसाद न देणे आणि त्यानंतर सरावासाठी वापरण्यात येणारी खेळपट्टी यावरही प्रश्न उपस्थित करण्यात आले आहेत.

IND vs AUS 4th Test : आर. अश्विनच्या जागी अनकॅप्ड खेळाडूची संघात एंट्री, BCCIने केली घोषणा; लवकरच पोहोचणार मेलबर्नला…

मेलबर्नमध्ये ऑस्ट्रेलियन संघाची कामगिरी….

ऑस्ट्रेलिया क्रिकेट संघाने या मैदानावर 116 कसोटी सामने खेळले आहेत. ऑस्ट्रेलियन संघाने एकूण 67 सामने जिंकले असून 32 सामने गमावले आहेत, तर 17 सामने अनिर्णित राहिले आहेत. 2010 पासून, ऑस्ट्रेलियाने या मैदानावर एकूण 14 सामने खेळले आहेत, त्यापैकी नऊ जिंकले आहेत, तीन हरले आहेत आणि दोन अनिर्णित राहिले आहेत.

मेलबर्नमध्ये गेल्या 14 वर्षांत ऑस्ट्रेलियाने तीन सामने गमावले आहेत आणि त्यापैकी दोन भारताने जिंकले आहेत. 2018 आणि 2020 मध्ये भारताने बाजी मारली होती. यापूर्वी 2010 मध्ये ऑस्ट्रेलियन संघाला या मैदानावर एक डाव आणि 157 धावांनी पराभव स्वीकारावा लागला होता.