आज शिवसेना खासदार संजय राऊत हे ईडी कार्यलयात चौकशीसाठी हजर राहणार आहेत. दोन दिवसांपूर्वी राज्यात मोठी उलथापालथ सुरु असताना संजय राऊत यांना आदींची नोटीस आली होती. सध्या राज्यात सत्तांतर झालेलं असून एकनाथ शिंदे हे नवीन मुख्यमंत्री महाराष्ट्राला मिळाले आहेत. अशातच राष्ट्रवादीचे सर्वेसर्वा शरद पवार यांना मोठा धक्का बसला आहे.

महाविकास आघाडी सरकार स्थापन करताना शरद पवार आणि संजय राऊत हे सत्ता स्थापनेच्या केंद्र स्थानी होते. आता राऊत यांना ईडीची नोटीस आल्यानंतर ते चौकशीला सामोरे जाणार आहेत. अशात शरद पवार यांना देखील आयकर विभागाकडून नोटीस आल्याचे स्वतः पवार यांनी सांगितलं. गुरुवारी रात्री पत्रकारांशी संवाद साधताना पवारांनी ही माहिती दिली.

काय म्हणालेत नेमकं शरद पवार
मला आयकर खात्याने प्रेमपत्र पाठवले आहे. २००४, २००९, २०१४ आणि २०२० मध्ये मी निवडणुकांना उभे राहताना निवडणूक आयोगाकडे प्रतिज्ञापत्र सादर केले होते. या प्रतिज्ञापत्रांमधील माहितीच्या अनुषंगाने मला सगळ्या वर्षांसाठीच्या नोटीस आता एकत्र पाठवल्या आहेत. सुदैवाने या सगळ्याची माहिती माझ्याकडे व्यवस्थित आहे. त्यामुळे ती माहिती द्यायला मला काही चिंता नाही, असे शरद पवार यांनी सांगितले.

पत्राचाळ प्रकरणामध्ये संजय राऊत आज चौकशीसाठी हजर राहणार आहेत. शरद पवार यांना आलेल्या नोटोसीनंतर पुन्हा एकदा तपास यंत्रणांवर दबाव आहे का ? असा प्रश्न विरोधकांनी विचारायला सुरुवात केली आहे. शरद पवार या नोटिशीना कसे उत्तर देतात याकडे सर्वांचे लक्ष लागले आहे.