पुणे – जिल्ह्यातील एकूण ५८ धर्मादाय रुग्णालयांतून निर्धन व दुर्बल रुग्णांना लाभ मिळत आहे. या रुग्णालयांना शासनाच्या विविध कर व अनुदान सवलती मिळतात. त्यामुळे गरीब रुग्णांसाठी आरक्षित खाटा उपलब्ध करून देणे त्यांच्यावर कायद्याने बंधनकारक आहे. निर्धन व दुर्बल घटकांतील रुग्णांना मोफत व सवलतीच्या दराने उपचार मिळावेत, यासाठी जिल्हाधिकारी यांच्या अध्यक्षतेखाली जिल्हास्तरीय समिती कार्यरत आहे. या समितीमार्फत धर्मादाय रुग्णालयातील आरक्षित खाटांची माहिती ऑनलाईन संकेतस्थळावर उपलब्ध करून देण्यात येते आणि त्यावर राज्यस्तरीय मदत कक्ष सतत देखरेख ठेवतो.

वैद्यकीय मदतीसाठी असा अर्ज करा –
रुग्णांना मदत मिळण्यासाठी जिल्हास्तरीय मुख्यमंत्री सहाय्यता निधी व धर्मादाय रुग्णालय मदत कक्षाकडे विहीत नमुन्यात अर्ज सादर करावा लागतो. त्यासाठी आवश्यक कागदपत्रे : रुग्णाचे आधारकार्ड, शिधापत्रिका, पॅनकार्ड, उत्पन्न प्रमाणपत्र (तहसीलदार यांच्याकडून), रुग्णालयाने दिलेले उपचाराचे अंदाजपत्रक हे आहेत.

याठिकाणी साधा संपर्क –
जिल्हास्तरीय मुख्यमंत्री सहायता निधी व धर्मादाय रुग्णालय मदत कक्ष अध्यक्ष तथा वैद्यकीय अधिकारी डॉ. मानसिंग साबळे यांच्याशी नागरिक संपर्क साधू शकतात. खोली क्रमांक १०, तळमजला, जुनी जिल्हा परिषद, पुणे याठिकाणी हा मदत कक्ष आहे. वैद्यकीय मदतीचा अर्ज भरण्यासंदर्भात अडचण आल्यास कक्ष प्रमुखांच्या ८०८७६७८९७७ या भ्रमणध्वनी टोल-फ्री हेल्पलाईन १८०० १२३ २२११क्रमांक, https://charitymedicalhelpdesk.maharashtra.gov.in या संकेतस्थळावर तसेच [email protected] ईमेल पत्त्यावर क्रमांकावर संपर्क साधावा, असे आवाहन करण्यात आले आहे.