Tukaram Mundhe ।  Salman Khan : बॉलिवूडचा दबंग खान सलमान खान आपल्या हटके अंदाजासाठी जितका प्रसिद्ध आहे, तितकाच त्याचा विनोदबुद्धीचा अंदाजही चाहत्यांना भावतो. आता सलमानची अशीच एक सोशल मीडिया पोस्ट चांगलीच चर्चेत आली आहे.

निमित्त होतं त्याच्या मैत्रिणीने मुंबईतील वांद्रे परिसरात सुरू केलेल्या नव्या कॅफेचं! कॅफेला शुभेच्छा देताना सलमानने कॉफी, किंमत आणि गुणवत्तेबाबत काही मजेशीर सूचना दिल्या; पण त्यानंतर त्याने घेतलेलं एक नाव पाहून सोशल मीडिया युझर्सचं लक्ष वेधलं गेलं. हे नाव होतं महाराष्ट्र FDAचे आयुक्त तुकाराम मुंढे यांचं.

सलमानने आपल्या इन्स्टाग्राम स्टोरीवर वांद्रे येथील The Tuck Shop at Savio’s या कॅफेचा व्हिडीओ शेअर केला. कॅफेच्या मालकीण असलेल्या आपल्या मैत्रिणीला शुभेच्छा देताना त्याने नेहमीच्या मिश्कील शैलीत कॉफी रिफिल करून देण्याची मागणी केली.

त्याचवेळी किंमत वाढवू नकोस, गुणवत्ता कायम ठेव आणि सर्वात महत्त्वाचं म्हणजे स्वच्छता राख, असा सल्लाही दिला. मात्र, स्वच्छतेच्या मुद्द्यावर सलमानने चक्क तुकाराम मुंढेंचं नाव घेतल्याने ही पोस्ट चर्चेचा विषय ठरली.

सलमानने आपल्या पोस्टमध्ये कॅफेच्या मालकीणीला मजेशीर अंदाजात म्हटलं की, कॉफी रिफिल करून दे, किंमत वाढवू नकोस, गुणवत्ता कायम ठेव आणि स्वच्छता राख; नाहीतर मी ‘त्यांना’ इथे पाठवेन. ‘त्यांना’ म्हणजे नेमकं कोण? हेही सलमानने स्पष्ट केलं, तुकाराम मुंढे!

यानंतर त्याने ‘इट्स डन सिस’ असा मजेशीर उल्लेख करत मैत्रिणीला शुभेच्छा दिल्या. पुढे एक दिवस आपण इथे ‘Being Human’चं टी-शर्ट आणि जीन्स घालून येणार असल्याचंही त्याने म्हटलं. कॅफेच्या मालकीणीचं कौतुक करताना सलमानने या व्हिडीओमध्ये बोलणारी व्यक्तीच कॅफेची मालकीण असल्याचं सांगितलं आणि मिश्कीलपणे तिला ‘बॅटमॅन’ म्हटलं.

सलमानची ही पोस्ट म्हणजे अर्थातच गंमतीदार अंदाजातील शुभेच्छा आणि स्वच्छतेबाबतचा संदेश आहे. पण तुकाराम मुंढेंचा उल्लेख झाल्यामुळे सोशल मीडियावर या पोस्टची चर्चा अधिक रंगली आहे.

दरम्यान, महाराष्ट्राचे अन्न व औषध प्रशासन (FDA) आयुक्त म्हणून तुकाराम मुंढे सध्या अन्नसुरक्षेबाबतच्या कडक कारवाईमुळे चर्चेत आहेत. त्यांच्या नेतृत्वाखाली राज्यभर हॉटेल्स, रेस्टॉरंट्स, खाद्यपदार्थ विक्रेते, डेअरी आणि इतर आस्थापनांची तपासणी सुरू आहे.