World Cup Format : क्रिकेटमध्ये फुटबॉलचा नियम! २०२७ वर्ल्डकपसाठी ICC चा अजब फॉरमॅट; ‘सुपर-७’ मधील ७ वा संघ कसा ठरणार?
World Cup Format : यावेळी सुपर-७ टप्प्याचाही समावेश करण्यात आला आहे, ज्यामध्ये दोन्ही गटांतील अव्वल ३ संघ थेट पात्र ठरतील, तर ७ वा संघ पूर्णपणे वेगळ्या पद्धतीने निश्चित केला जाईल.
ICC ODI World Cup 2027 Format Explained Super 7 Stage Football Style Rule : आयसीसीने आगामी एकदिवसीय विश्वचषक २०२७ चे (ODI World Cup 2027) वेळापत्रक जाहीर केल्यानंतर या स्पर्धेच्या अनोख्या आणि रंजक फॉरमॅटचा उलगडा झाला आहे. दक्षिण आफ्रिका, झिम्बाब्वे आणि नामिबिया यांच्या संयुक्त यजमानपदाखाली २ ऑक्टोबर ते २१ नोव्हेंबर २०२७ दरम्यान ही स्पर्धा खेळवली जाणार आहे. यंदा स्पर्धेत मुख्य फेरीसाठी १२ संघ उतरणार असून, त्यांचे ६-६ च्या दोन गटांत विभाजन करण्यात आले आहे. साखळी फेरीनंतर थेट ‘सुपर-७’ फेरी (Super-7 Stage) रंगणार असून, सातव्या संघाच्या निवडीसाठी आयसीसीने फुटबॉल विश्वचषकासारखा अनोखा नियम लागू केला आहे.
फुटबॉल वर्ल्डकपच्या नियमाने होणार ७ व्या संघाचा फैसला!
फुटबॉल विश्वचषक २०२६ च्या धर्तीवर आयसीसीने हा रंजक नियम अमलात आणला आहे. ‘ग्रुप ए’ आणि ‘ग्रुप बी’ मधील अव्वल ३-३ संघ थेट सुपर-७ फेरीत प्रवेश करतील. मात्र, सातव्या संघासाठी दोन्ही गटांत चौथ्या स्थानावर राहिलेल्या दोन संघांमध्ये तुलना केली जाईल. ज्या संघाचे गुण आणि नेट रनरेट (NRR) सरस असेल, त्या चौथ्या क्रमांकाच्या एकाच संघाला सुपर-७ चे शेवटचे तिकीट मिळेल, तर दुसऱ्या गटातील चौथा संघ थेट स्पर्धेतून बाहेर पडेल.
असे आहेत विश्वचषकाचे दोन मुख्य गट:
Your guide to the new Men’s @cricketworldcup format for the 2027 edition in South Africa, Zimbabwe and Namibia 🏆
Stay tuned to ICC channels as we prepare to launch the full ICC Men’s #CWC27 match schedule on October 1, with fans able to enter the ticket ballot at the same time… pic.twitter.com/eGYntcEnjc
— ICC (@ICC) September 30, 2026
ग्रुप ए: भारत, ऑस्ट्रेलिया, पाकिस्तान, अफगाणिस्तान, झिम्बाब्वे आणि क्वालिफायर संघ.
ग्रुप बी: दक्षिण आफ्रिका, न्यूझीलंड, श्रीलंका, इंग्लंड, बांगलादेश आणि क्वालिफायर संघ.
राउंड रॉबिन पद्धतीने ‘सुपर-७’ फेरी; टॉप-४ संघ सेमीफायनलमध्ये –
सुपर-७ फेरीचे सामने २५ ऑक्टोबरपासून खेळवले जातील. ही फेरी संपूर्णपणे राउंड-रॉबिन फॉरमॅटमध्ये पार पडेल. म्हणजेच या फेरीतील प्रत्येक संघाला इतर ६ संघांविरुद्ध प्रत्येकी एक सामना खेळावा लागेल. या ६ सामन्यांनंतर गुणतालिकेत आघाडीवर राहणारे अव्वल चार (Top-4) संघ थेट उपांत्य फेरीत प्रवेश करतील आणि त्यांच्यातील विजेत्यांमध्ये २१ नोव्हेंबरला विश्वविजेतेपदाचा महामुकाबला रंगेल.
