Vijay Wadettiwar – काँग्रेसचे ज्येष्ठ नेते आणि विधानसभेचे विरोधी पक्षनेते विजय वडेट्टीवार हे काँग्रेस पक्षाची साथ सोडून शिवसेना (शिंदे गट) किंवा महायुतीत प्रवेश करणार असल्याच्या चर्चा गेल्या काही दिवसांपासून राजकीय वर्तुळात रंगत आहेत.

या सर्व चर्चांना आणि अफवांना आता स्वतः विजय वडेट्टीवार  (Vijay Wadettiwar )  यांनी पूर्णविराम दिला आहे. मी काँग्रेस पक्षाचा एक निष्ठावंत कार्यकर्ता असून सत्तेसाठी किंवा पदासाठी विचारांशी तडजोड करण्याचा प्रश्नच उद्भवत नाही, असे स्पष्ट करत त्यांनी पक्षबदलाच्या सर्व चर्चा फेटाळून लावल्या आहेत.

विजय वडेट्टीवार यांनी सोशल मीडियाद्वारे आपली भूमिका मांडताना विरोधकांवर आणि काही माध्यमांवर जोरदार निशाणा साधला. ते म्हणाले, हे केवळ बदनामीचे राजकारण आहे.

जेव्हा जेव्हा मी महायुती सरकारच्या अपयशावर आणि चुकीच्या धोरणांवर आवाज उठवतो, तेव्हा काही जण जाणीवपूर्वक माझ्याविषयी खोट्या आणि दिशाभूल करणाऱ्या अफवा पसरवतात.   (Vijay Wadettiwar )

शिंदे गटात जाणार का? कोणाला भेटले का? अशा निराधार बातम्या पेरून जनतेमध्ये संभ्रम निर्माण केला जात आहे. कोणतंही तथ्य नसताना असे प्रश्न विचारणे ही पत्रकारिता नसून खोडसाळपणा असल्याचे त्यांनी स्पष्ट केले.

 

राज्यातील मूळ प्रश्नांवरून जनतेचे लक्ष विचलित करण्यासाठीच हा डाव रचला जात असल्याचा आरोप वडेट्टीवार यांनी केला. आज राज्यात शेतकरी संकट, वाढती बेरोजगारी, महागाई, कायदा-सुव्यवस्थेचा बोजवारा आणि महिला सुरक्षेचा गंभीर प्रश्न निर्माण झाला आहे.

या महत्त्वाच्या विषयांवर सरकारने उत्तर देणे अपेक्षित असताना, विरोधक मुद्दाम व्यक्तिगत बदनामी करून मूळ प्रश्न दडपण्याचा प्रयत्न करत असल्याचे ते म्हणाले.

आपण काँग्रेसच्या विचारांशी प्रामाणिक असून जनतेच्या हक्कांसाठीचा संघर्ष काँग्रेसमध्येच राहून सुरू ठेवणार असल्याचा ठाम विश्वास त्यांनी व्यक्त केला आहे.