HSRP Number Plate: पिंपरी-चिंचवडमध्ये ९ लाखांहून अधिक वाहने एचएसआरपी विना; आरटीओची धडक तपासणी मोहीम सुरू
HSRP Number Plate: अधिकृत संकेतस्थळावरून तातडीने नोंदणी करण्याचे आवाहन; पिंपरी-चिंचवडच्या विविध भागांत आरटीओ पथकांकडून वाहनांची तपासणी.
HSRP Number Plate – सरकारने प्रत्येक वाहनांना हाय सिक्युरिटी रजिस्ट्रेशन प्लेट (एचएसआरपी) बंधनकारक केले आहे. अनेकदा मुदतवाढ देत वाहनमालकांना एचएसआरपी बसवून घेण्याचे आवाहन केले आहे. परंतु अजूनही शहरातील रस्त्यांवर असंख्य वाहने जुन्या आणि फॅन्सी नंबरप्लेटसह फिरत आहेत. पिंपरी-चिंचवड आरटीओ अंतर्गत १ एप्रिल २०१९ पूर्वी नोंदणीकृत सुमारे १५ लाख वाहने आहेत. त्यापैकी ५ लाख ३७ हजार ४४१ वाहनांवरच एचएसआरपी बसविण्यात आली आहे.
जवळपास ९ लाखांहून अधिक वाहनांवर एचएसआरपी बसविणे बाकी आहे. शहरातील मोठ्या संख्येने वाहनांवर अद्याप हाय सिक्युरिटी रजिस्ट्रेशन प्लेट (एचएसआरपी) बसविण्यात आलेली नसल्याचे समोर आले आहे. त्यामुळे एचएसआरपी नसलेल्या वाहनांवर प्रादेशिक परिवहन कार्यालयाने (आरटीओ) कारवाईचा बडगा उगारला असून, शहरातील विविध भागांत विशेष तपासणी मोहीम राबविण्यात येत आहे.
नियमांचे पालन न करणाऱ्या वाहनचालकांवर दंडात्मक कारवाई सुरू करण्यात आली आहे. आरटीओ कडून उपलब्ध झालेल्या आकडेवारीनुसार, शहरात सुमारे १५ लाख वाहने आहेत. त्यापैकी ५ लाख ३७ हजार ४४१ वाहनांवरच एचएसआरपी बसविण्यात आली आहे. जवळपास ९ लाखांहून अधिक वाहनांवर एचएसआरपी बसविणे बाकी आहे. एवढ्या मोठ्या संख्येने वाहने अजूनही जुन्याच नंबर प्लेटसह रस्त्यावर धावत असल्याने तपासणी मोहिमेला वेग देण्यात आला आहे.
वाहतूक पोलीस.
एचएसआरपी (हाय सिक्युरिटी रजिस्ट्रेशन प्लेट) ही वाहनांसाठी अधिक सुरक्षित मानली जाणारी नंबर प्लेट आहे. या प्लेटवर क्रोमियम आधारित होलोग्राम, लेझरद्वारे कोरलेला कायमस्वरूपी ओळख क्रमांक आणि छेडछाड झाल्यास पुन्हा वापरता न येणारी लॉकिंग प्रणाली असते. त्यामुळे वाहनांची अचूक ओळख पटविणे सोपे होते. तसेच बनावट नंबर प्लेट, वाहनचोरी आणि गुन्ह्यांमध्ये वापरल्या जाणाऱ्या वाहनांचा मागोवा घेण्यासाठीही एचएसआरपी प्रभावी ठरते.
महाराष्ट्रात १ एप्रिल २०१९ पूर्वी नोंदणीकृत वाहनांसाठी एचएसआरपी बसविणे बंधनकारक करण्यात आले असून १ जुलै २०२६ पासून या नियमाची कडक अंमलबजावणी सुरू झाली आहे. त्यामुळे एच एस आर पी नसलेल्या वाहनांवर दंडात्मक कारवाई केली जात आहे. आरटीओ प्रशासनाने सर्व वाहनधारकांनी अधिकृत संकेतस्थळावर नोंदणी करून मान्यताप्राप्त केंद्रावरून एचएसआरपी बसवून घ्यावी, असे आवाहन केले आहे. नियमांचे पालन न केल्यास तपासणीदरम्यान दंडासह पुढील कायदेशीर कारवाईला सामोरे जावे लागू शकते, असेही प्रशासनाने स्पष्ट केले आहे.
