HSRP Number Plate – राज्य परिवहन विभागाने २०१९ पूर्वीच्या वाहनांना उच्च सुरक्षा नोंदणी क्रमांक पाटी (एचएसआरपी) बसविण्यास पुन्हा दीड महिन्याची म्हणजेच दि. ३० जूनपर्यंत मुदतवाढ दिली आहे. त्यामुळे वाहनचालकांना दिलासा मिळाला असून, १ जुलैपासून एचएसआरपी नंबर प्लेट नसलेल्या वाहनांवर दंडात्मक कारवाईचा बडगा उगारण्यात येणार असल्याचे राज्य परिवहन विभागाकडून स्पष्ट करण्यात आले. राज्यात २०१९ पूर्वीच्या सर्व वाहनांना एचएसआरपी बसविणे सर्वोच्च न्यायालयाच्या आदेशानंतर बंधनकारक आहे. मात्र, पुणे शहरासह राज्यातील बहुतांश जिल्ह्यात या एचएसआरपी बसवून घेण्यात काही वाहनचालकांमध्ये उदासीनता दिसून आली. परिणामी निम्याहून अधिक वाहनांना अद्याप एचएसआरपी नंबर बसलेली नाही. त्यानुसार राज्याचे परिवहनमंत्री प्रताप सरनाईक यांनी एचएसआरपी नंबरप्लेट बसविण्यास ३० जूनपर्यंत मुदत दिल्याचे सांगितले. दरम्यान, पुणे शहरात २५ लाखांपेक्षा जास्त वाहनांना ही नंबरप्लेट बसवावी लागणार आहे. मागील दीड वर्षात अनेकवेळा नंबर प्लेट बसविण्यासाठी मुदतवाढ देण्यात आली, तरीही आतापर्यंत केवळ ११ लाख ३४ हजार ६८४ वाहन मालकांनी एचएसआरपीसाठी नोंदणी केली आहे. त्यातील ११ लाख ३२ हजार १०८ जणांना नंबरप्लेट बसविण्यास वेळ दिली असून, त्यातील ९ लाख ३० हजार २६९ वाहनमालकांनी नंबरप्लेट बसवून घेतली आहे. आजही ६३ टक्के वाहनमालकांनी नोंदणी केलेली नाही. त्यामुळे पुढील दीड महिन्यात नोंदणी न केलेल्या जवळपास १६ लाख वाहनांना एचएसआरपी नंबरप्लेट बसणार का? असा प्रश्न उपस्थित होत आहे.
