HSRP Number Plate – राज्य परिवहन विभागाने २०१९ च्या पूर्वीच्या वाहनांना उच्च सुरक्षा नोंदणी क्रमांक पाटी (एचएसआरपी) बसविणे बंधनकारक केले आहे. त्यासाठी सहा वेळा मुदतवाढ देण्यात आली. मात्र, पुणे आरटीओअंतर्गत २६ लाख वाहनांपैकी केवळ ११ लाख ८६ हजार ३११ वाहनधारकांनी अर्ज केले असून, त्यातही केवळ ९ लाख ७४ हजार ७८८ जणांनी नंबरप्लेट बसवून घेतली आहे. म्हणजेच आत्तापर्यंत निम्याही वाहनांना एचएसआरपी बसली नसल्याचे स्पष्ट होते.

१ एप्रिल २०१९ पासून नवीन वाहनांना एचएसआरपी नंबरप्लेट देण्यास सुरुवात झाली होती. त्यानंतर डिसेंबर २०२४ मध्ये राज्य परिवहन विभागाने मानक कार्यप्रणाली जारी करून २०१९ पूर्वीच्या जुन्या वाहनांनाही एचएसआरपी बंधनकारक केले. आतापर्यंत सहावेळा मुदतवाढ दिली, तरी गेल्या दीड वर्षात केवळ ९ लाख ७४ हजार वाहनांवर नंबरप्लेट बसली असून, पुण्यातील एकूण वाहनसंख्येचा विचार करता ही आकडेवारी चिंताजनक आहे.

मागील १५ वर्षांत शहरात तब्बल ४० लाख वाहनांची नोंदणी झाली. यातील २०१९ पूर्वीच्या वाहनांची आकडेवारी पाहिली, तर १ एप्रिल २००५ ते ३० मार्च २०१९ या काळात ३१ लाख १२ हजार २०३ नवीन वाहने रस्त्यावर आली. सध्याच्या स्थितीत १ एप्रिल २०११ ते ३० मार्च २०१९ या आठ वर्षांच्या काळातील २१ लाख ७ हजार ८०३ वाहने १५ वर्षांच्या आतील आहेत. त्याचप्रमाणे १५ वर्षांचा कार्यकाळ संपल्यानंतर अनेक वाहनधारक ५ वर्षांचा ग्रीन टॅक्स भरून वाहनाची मुदत वाढवून घेतात.

अशी मागील ५ वर्षांत १० लाख ४ हजार ४०० वाहने नोंदवली आहेत. यातील साधारण ५० टक्के वाहने जरी ग्रीन टॅक्स भरून रस्त्यावर धावत असल्याचे गृहीत धरले, तरी सध्या पुणे आरटीओच्या कार्यक्षेत्रात अंदाजे २६ लाखापेक्षा अधिक जुनी वाहने वापरात आहेत. या २६ लाख वाहनांपैकी केवळ ११ लाख ८३ हजार वाहन मालकांनीच एचएसआरपीसाठी नोंदणी केली. म्हणजेच ५० टक्क्यांपेक्षा जास्त वाहनधारकांनी अद्याप या नियमाकडे पाठ फिरवली आहे.

व्हीआयपींवर कारवाई का नाही?
पुणे आरटीओ आणि वाहतूक पोलिसांकडून एचएसआरपी प्लेट नसलेल्या वाहनांवर सुरू असलेल्या दंडात्मक कारवाईत सर्वसामान्यांनाच लक्ष्य केले जात असल्याचा संताप सोशल मीडियावर व्यक्त होत आहे. बड्या व्यक्तींच्या (व्हीआयपी) गाड्यांकडे दुर्लक्ष करून केवळ सर्वसामान्यांच्या वाहनांवर कारवाई का, असा प्रश्न वाहनधारक विचारत आहेत.

एकूण झालेली नोंदणी : ११,८६,३११
-नंबरप्लेटसाठी वेळ मिळालेले वाहनधारक : ११,८३,२८८
-यशस्वीरीत्या नंबरप्लेट बसवलेली वाहने : ९,७४,७८८
-वेळ मिळूनही नंबरप्लेट न बसवलेली वाहने : २,०८,५००
-अद्याप मंजूर न झालेले अर्ज : ३,०२३