अहमदनगर : ईडी आणि सीबीआय चौकशीवरुन शिवसेना आणि भाजप यांच्यात सध्या शाब्दिक युद्ध सुरु झाले आहे. त्यातच राज्यचे उद्योग मंत्री सुभाष देसाई यांनी भाजप आणि केंद्र सरकारवर निशाण साधला आहे. ‘ईडीची कारवाई ठराविक पक्ष आणि नेत्यांवरच कशी होते?, अशी शंका उपस्थित करत या सगळ्याविरोधात लढायला आम्ही समर्थ असल्याचे  सांगत केंद्र सरकार आणि भाजपविरोधात त्यांनी दंड थोपटले आहेत.

देशात आणि महाराष्ट्रात कसे आणि कोणते राजकारण चाललंय, हे सध्या सर्वांना माहिती आहे. नेमक्या ठराविक लोकांवर आणि पक्षांवर ईडी कशी काय कारवाई होते, असा सवाल सुभाष देसाई यांनी उपस्थित केला आहे. यांचे राजकारण आता सर्वाना कळले  असून अशा प्रकारच्या कारवायांना महाविकास आघाडीचे नेते तोंड द्यायला समर्थ आहेत, असं म्हणत त्यांनी भाजपविरोधात दंड थोपटले. ते अहमदनगरमध्ये बोलत होते.

त्याचबरोबर मुख्यमंत्र्यांनी उद्धव ठाकरेंनी ओबीसी आणि मराठा आरक्षणाच्या मुद्यावर बैठक घेतलीये. राज्य सरकार अत्यंत गंभीर असून दोन्ही समाजाला न्याय मिळण्यासाठी राज्य सरकार आपल्या जबाबदारीतील कामे करायला तयार आहेय. मात्र केंद्राने देखील जबाबदारी घेतली पाहिजे म्हणजे दोन्ही समाजाला न्याय मिळेल असेही ते म्हणाले.

रत्नागिरी जिल्ह्यातील दापोली तालुक्यातील मुरुड समुद्रकिनारी परिवहन मंत्री अनिल परब यांचे दोन अनधिकृत रिसॉर्ट असल्याचा दावा भाजपचे नेते किरिट सोमय्या यांनी केलाय. सिंधुदुर्ग जिल्ह्याच्या दौऱ्यावर आलेल्या किरीट सोमय्या यांनी परिवहन मंत्री अनिल परब यांच्याविरोधात आणखी एक आरोप केला आहे. मुरुड मधील साई रिसॉर्ट एन एक्स हे अनधिकृत आहे, त्याशिवाय अनिल परब यांचे आणखी एक अनधिकृत रिसॉर्ट आहे. हे लपवलेल्या रिसॉर्टचे नाव सी कॉन्च रिसॉर्ट असल्याचा दावा भाजप नेते किरीट सोमय्या यांनी केला आहे.

महाराष्ट्र कोस्टल झोन ऑथोरिटीकडून कारवाई करण्याचे आदेश दिले आहेत. या आदेशाच्या पत्रातून हे दुसरं रिसॉर्ट अनधिकृत असल्याचा दावा किरीट सोमय्या यांनी केला. हे दोन्ही रिसॉर्ट अनधिकृत असल्याचं पत्र राज्याच्या पर्यावरण खात्याने देखील दिले आहे. मात्र अनिल परब यांचे अनधिकृत दुसरे रिसॉर्ट ठाकरे सरकराने लपवल्याचा आरोप किरीट सोमय्या यांनी केला आहे.