Sonia Gandhi – कॉंग्रेस संसदीय समितीच्या अध्यक्षा सोनिया गांधी यांनी इन्स्टाग्रामवर पदार्पण करताना आपल्या आगामी आत्मचरित्राची पहिली झलक शेयर केली. बिलॉन्गिंग : अ जर्नी ऑफ लव्ह असे पुस्तकाचे नाव असून ते १० नोव्हेंबर रोजी प्रकाशित करण्यात येणार आहे.

सोनिया गांधी यांनी इन्स्टाग्राम व्हिडियोच्या माध्यमातून पुस्तकाची प्रत दाखवली. ही प्रेम, कर्तव्य, नुकसान आणि स्वतःचे हक्काचे स्थान शोधण्याची कथा आहे, असे त्यांनी पोस्टमध्ये म्हटले.

या व्हिडिओमध्ये त्या प्रियांका गांधी-वाड्रा यांच्यासोबत पुस्तकाच्या पहिल्या प्रती स्वीकारताना आणि मिठाई वाटताना दिसत आहेत. पुस्तकात अनेक छायाचित्रांचाही समावेश करण्यात आला आहे.

हार्परकॉलिन्स इंडिया हे पुस्तक भारतात प्रकाशित करणार आहे. यापूर्वी पेंग्विन रँडम हाऊस इंडियासोबत हस्तलिखितातील संपादकीय बदलांवरून मतभेद झाल्याच्या बातम्यांमुळे प्रकाशनाबाबत अनिश्चितता निर्माण झाली होती.

पेंग्विनने पुस्तक प्रकाशित न करण्याचा निर्णय घेतला. मात्र, बाह्य दबावामुळे हा निर्णय घेतल्याचा आरोप प्रकाशकाने फेटाळला आणि करारातील गोपनीयतेमुळे मतभेदांचे नेमके स्वरूप उघड केले नाही.

या आत्मचरित्रात इटलीतील बालपण, राजीव गांधी यांच्याशी झालेली भेट, विवाह आणि भारतीय संस्कृतीशी जुळवून घेण्याचा प्रवास यांचा समावेश आहे. इंदिरा गांधी आणि राजीव गांधी यांच्या हत्या तसेच संजय गांधी यांच्या मृत्यूमुळे गांधी कुटुंबावर झालेल्या आघातांचाही यात उल्लेख आहे.

२००४ मधील काँग्रेसच्या नेतृत्वाखालील आघाडीचा विजय आणि पंतप्रधानपद स्वीकारण्यास सोनिया गांधी यांनी दिलेला नकार यांसारख्या महत्त्वाच्या राजकीय घडामोडींवरही पुस्तकात प्रकाश टाकण्यात आला आहे.