Haveli Panchayat Samiti – हवेली तालुका पंचायत समितीच्या सभापतीपदासाठी उत्सुकता शिगेला पोहोचली असून, राष्ट्रवादी काँग्रेसकडून युवराज काकडे आणि मनोज चौधरी यांच्यात जोरदार रस्सीखेच सुरू आहे. 12 सदस्यीय पंचायत समितीत राष्ट्रवादी काँग्रेस 6, भाजपला 4, शिवसेना (शिंदे गट) ला 1 आणि 1 जागा अपक्ष उमेदवाराने जिंकली आहे. बहुमताचा आकडा 7 असल्याने अपक्ष सदस्याची भूमिका निर्णायक ठरणार आहे. सभापतीपद यंदा सर्वसाधारण खुल्या प्रवर्गासाठी राखीव आहे. राष्ट्रवादीकडून दोन प्रमुख इच्छुकांची नावे चर्चेत आहेत. थेऊर गणातील युवराज काकडे हे विक्रमी 5,212 मताधिक्याने निवडून आले आहेत. स्थानिक विकासकामे, आरोग्यविषयक उपक्रम आणि नागरिकांशी सातत्यपूर्ण संपर्क यामुळे त्यांनी मजबूत जनाधार निर्माण केला आहे. नागरिकांच्या आरोग्य समस्यांसाठी ते तत्पर असतात. विविध आरोग्य शिबिरे आणि सामाजिक उपक्रमांत ते अग्रेसर असल्याने कार्यकर्त्यांतून ज्यांना मोठा जनकौल, त्यांनाच सभापतीपद असा सूर उमटत आहे. दुसरीकडे, कोरेगावमूळ गणातील मनोज चौधरी अवघ्या 4 मतांच्या फरकाने विजयी झाले असून त्यातील दोन मते पोस्टल मतांची होती. त्यांचा राजकीय वारसा, संघटनात्मक समन्वय आणि गटबांधणीतील कौशल्य ही त्यांची जमेची बाजू मानली जाते. अल्प मताधिक्य असले तरी पक्षांतर्गत समीकरणांत त्यांचे महत्त्व कमी लेखले जात नाही. एकीकडे विक्रमी मताधिक्याचा कौल, तर दुसरीकडे संघटनात्मक गणिते-अशा पेचात अंतिम निर्णय पक्षश्रेष्ठींवर अवलंबून आहे. सामाजिक समतोल, आगामी राजकीय धोरणे आणि स्थानिक समीकरणे लक्षात घेऊन निर्णय होण्याची शक्यता आहे. त्यामुळे हवेली तालुक्यात सध्या एकच प्रश्न चर्चेत आहे-सभापतीपदाची माळ कुणाच्या गळ्यात पडणार? योगायोग म्हणजे युवराज काकडे यांचे वडील हिरामण काकडे आणि मनोज चौधरी यांचे वडील बाळासाहेब (दत्तात्रय) चौधरी हे दोघेही हवेली पंचायत समितीचे माजी सदस्य राहिलेले आहेत. अपक्ष गायकवाड यांची भूमिका महत्त्वाची वडकी गणात अपक्ष उमेदवार विद्या दत्तात्रय गायकवाड यांनी भाजप आणि राष्ट्रवादी काँग्रेसच्या उमेदवारांना पराभूत करत विजय मिळविला आहे. त्यामुळे त्यांच्या मताला विशेष महत्त्व प्राप्त झाले आहे. जिकडे विद्या गायकवाड यांचे मत, तिकडे सभापती अशी चर्चा सध्या नागरिकांमध्ये रंगली आहे. राष्ट्रवादी काँग्रेसला बहुमताचा आकडा पार करण्यासाठी त्यांच्या पाठिंब्याची गरज भासणार असून, अपक्ष सदस्य म्हणून त्यांची भूमिका निर्णायक ठरणार आहे.
