NCP Merger : गेल्या काही दिवसांपासून महाराष्ट्राच्या राजकीय वर्तुळात राष्ट्रवादी काँग्रेस (अजित पवार गट) आणि राष्ट्रवादी काँग्रेस शरदचंद्र पवार पक्षाच्या संभाव्य विलीनीकरणाबाबत (NCP Merger) जोरदार चर्चा सुरू होत्या. अजित पवार गटातील काही प्रमुख नेत्यांनी शरद पवार यांची घेतलेली भेट आणि त्यानंतर झालेल्या घडामोडींमुळे या चर्चांना मोठे उधाण आले होते. मात्र, विलीनीकरणाचा हा मुद्दा आता पूर्णपणे निकाली निघाला असून आमच्यासाठी हा विषय आता संपला आहे, असे स्पष्ट प्रतिपादन शरद पवार गटाचे सरचिटणीस सुनील माने यांनी केले आहे.

“अजितदादांच्या भूमिकेनंतर विलीनीकरणाचा प्रश्नच नाही”
सुनील माने यांनी प्रसारमाध्यमांशी बोलताना पक्षाची अधिकृत भूमिका स्पष्ट केली. “आमचे सर्वोच्च नेते शरद पवार, प्रदेशाध्यक्ष शशिकांत शिंदे आणि आमदार रोहित पवार यांनी विलीनीकरणाचा मुद्दा आमच्यासाठी संपल्याचे आधीच स्पष्ट केले आहे. या सगळ्या घडामोडींमागे अजित पवार यांची मुख्य भूमिका होती. आम्ही यापूर्वी महापालिका आणि जिल्हा परिषद निवडणुका एकत्र लढवल्या (NCP Merger) होत्या, त्यामुळे भविष्यातील राजकीय दिशा ठरवण्यासाठी एकत्र येऊन निर्णय घेणे आवश्यक होते. मात्र, तसे घडले नाही. त्यामुळे आता विलीनीकरणाचा विषय कायमचा थांबला आहे,” असे माने म्हणाले.

रोहित पवारांची महत्त्वाची अट
माध्यमांमध्ये सुरू असलेल्या चर्चांवर बोलताना माने म्हणाले की, “सध्या या विलीनीकरणाची चर्चा केवळ प्रसारमाध्यमांपुरतीच उरली आहे. पक्षाचे मासिक आणि अधिकृत पत्रकातही प्रदेशाध्यक्ष शशिकांत शिंदे यांनी हा मुद्दा संपुष्टात आल्याचे स्पष्ट नमूद केले आहे. आमदार रोहित पवार यांनी यापूर्वीच स्पष्ट अट घातली होती की, जर कोणाला शरदचंद्र पवार पक्षात परत यायचे असेल, तर त्यांना भारतीय जनता पक्षाची (भाजप) साथ सोडावी लागेल. त्यामुळे आता दोन्ही गटांच्या एकत्रीकरणाबाबत कोणतीही चर्चा सुरू नाही.”

सुनील तटकरेंचा ‘यू-टर्न’
दरम्यान, अजित पवार गटाचे प्रदेशाध्यक्ष सुनील तटकरे यांच्या एका वक्तव्यानंतर राजकीय वर्तुळात विलीनीकरणाच्या शक्यतेला बळ मिळाले होते. “अजित पवार १२ फेब्रुवारीलाच विलीनीकरणाची अधिकृत घोषणा करणार होते,” असा दावा तटकरे यांनी केला होता. मात्र, त्यानंतर बदललेल्या राजकीय समीकरणांमुळे तटकरे यांनीही आपल्या भूमिकेतून माघार घेत (यू-टर्न) विलीनीकरणाचा विषय थांबला असल्याचे स्पष्ट केले. दोन्ही बाजूंच्या प्रमुख नेत्यांच्या या विधानांमुळे अखेर राष्ट्रवादीच्या एकत्रिकरणाच्या चर्चांवर पूर्णविराम लागल्याचे स्पष्ट (NCP Merger) झाले आहे.