पुणेः गुइलेन बॅरी सिंड्रोम या दुर्मिळ आजाराने पुणेकरांना धडकी भरवली आहे. गेल्या काही दिवसांत या आजाराच्या रुग्णांमध्ये सातत्याने वाढ होत आहेत. पिंपरी-चिंचवडमधून आता या आजाराबाबत एक धक्कादायक बातमी समोर आली आहे. या आजाराचा संसर्ग झालेल्या एका ६४ वर्षीय महिलेचा मृत्यू झाल्याने मोठी खळबळ उडाली आहे. या महिलेच्या मृत्यूमुळे भीतीचे वातावरण तयार झाले आहे.

पुणे शहरासह पिंपरी-चिंचवडमध्ये गुईलेन बॅरे सिंड्रोम आजाराची लागण होणारे रुग्ण आढळून येत आहेत. ही ६४ वर्षीय महिला येथील रहिवासी असून या आजाराची लागण झाल्यानंतर तिच्यावर महापालिकेच्या यशवंतराव चव्हाण स्मृती चव्हाण (वायसीएम) रुग्णालयात उपाचार करण्यासाठी दाखल करण्यात आले होते. मात्र, या आजाराची लागण झाल्यानंतर महिलेला न्यूमोनिया झाला आणि त्यामुळे तिचा मृत्यू झाल्याची माहिती मिळत आहे.

पिंपरी-चिंचवडमध्ये गुईलेन बॅरे सिंड्रोमचे १३ रुग्ण आहेत. त्यापैकी सहा जण या आजारातून बरे झाले असून त्यांना घरी देखील सोडण्यात आले आहे. ही सुखावणारी गोष्ट असतानाच या आजाराची लागण झालेल्या एका ६४ वर्षांच्या महिलेच्या मृत्यूमुळे भीतीचे वातावरण तयार झाले आहे. १७ नोव्हेंबर रोजी या महिलेला गुईलेन बॅरे सिंड्रोमची लागण झाली होती.

महिलेला उपचारांसाठी खाजगी रुग्णालयात दाखल करण्यात आले होते. मात्र, श्वसनाचा त्रास जाणवत असल्याने २४ नोव्हेंबरल डॅा. डी वाय पाटील रुग्णालयात दाखल करण्यात आले. त्यानंतर न्यूमोनियाची लागण झाली. २९ डिसेंबरला या महिलेला वायसीएम रुग्णालयात उपचारासाठी हलवण्यात आले. महिलेवर उपचार सुरू असताना २१ जानेवारीला या महिलेचा मृत्यू झाला, अशी माहिती डॅाक्टरांनी दिली आहे.