Gram Panchayat Election – वाई तालुक्यातील 99 ग्रामपंचायतीची वॉर्डनिहाय आरक्षण सोडत अखेर जाहीर झाली. निवडणूक निर्णय अधिकारी तथा तहसीलदार श्रीमती सोनाली मेटकरी यांच्या आदेशान्वये हा संपूर्ण आरक्षण कार्यक्रम पारदर्शक पद्धतीने राबविण्यात आला. या आरक्षण सोडतीमुळे ग्रामपंचायत निवडणुकांचे बिगुल वाजल्याचे स्पष्ट झाले असून तालुक्यात राजकीय घडामोडींना वेग आला आहे. अत्यंत महत्त्वाचा आणि संवेदनशील आरक्षण कार्यक्रम यशस्वी करण्यासाठी प्रशासनाने जय्यत तयारी केली होती.

तहसीलदार सोनाली मेटकरी यांच्या मार्गदर्शनाखाली महसूल कर्मचारी, पंचायत समितीचे कर्मचारी, बांधकाम विभाग आणि कृषी विभागाच्या कर्मचार्‍यांची गावनिहाय विशेष नेमणूक करण्यात आली होती. सर्व नियुक्त कर्मचार्‍यांनी शिस्तीत आणि नियमांचे पालन करत ही सोडत प्रक्रिया पूर्ण केली. विशेष म्हणजे यापूर्वीच सरपंच पदाचे आरक्षण जाहीर करण्यात आले असून सरपंचाची निवड ही थेट जनतेतून होणार आहे. आरक्षण जाहीर झाल्यामुळे आता गावागावातील पॅनल प्रमुखांना आणि इच्छुकांना नवीन राजकीय गणिते मांडवी लागणार आहेत.

सरपंच निवड आणि वॉर्डांचे नवीन आरक्षण यामुळे गावातील अंतर्गत गटातटाचे राजकारण अधिक रंजक होण्याची चिन्हे आहेत. या आरक्षण सोडतीमुळे अनेक गावांमध्ये अपेक्षित बदल पाहायला मिळाणार असून अनेक दिवसांपासून तयारी करणार्‍या आणि विशिष्ट वॉर्डातून निवडणूक लढण्यास इच्छुक असणार्‍या उमेदवारांचा या आरक्षणामुळे मोठा भ्रमनिरास झाला आहे.

हक्काचा वॉर्ड दुसर्‍या प्रभागासाठी आरक्षित झाल्याने अनेकांना माघार घ्यावी लागणार आहे. तर दुसरीकडे नवीन चेहर्‍यांना आणि राखीव प्रवर्गातील इच्छुकांना या आरक्षणामुळे मोठी संधी चालून आली आहे. एकंदरीतच या आरक्षण सोडतीमुळे कुठे आनंदाचे तर कुठे निराशेचे वातावरण पाहायला मिळत आहे. वाई तालुक्यात आत्तापासूनच निवडणुकीची रणधुमाळी उडणार असल्याचे चिन्ह स्पष्ट झाले आहेत.