Gawadewadi Firing Case – गावडेवाडी (ता. हवेली) येथे व्यावसायिकावर गोळीबार करून 11 लाख रुपये किमतीच्या दोन सोनसाखळ्या लुटून पसार झालेल्या परराज्यातील सराईत गुन्हेगारांच्या टोळीचा पुणे शहर गुन्हे शाखेच्या युनिट-7 आणि दरोडा व वाहनचोरीविरोधी पथक-2 ने अवघ्या 12 तासांत छडा लावला. तिघांना मध्य प्रदेशातील इंदूर येथून अटक करण्यात आली असून, या कारवाईमुळे पोलिसांनी गुन्ह्याचा तपास वेगाने पूर्णत्वास नेला आहे.

अटक करण्यात आलेल्या आरोपींमध्ये अविनाश कृष्णचंद्र त्रिपाठी (वय 43, रा. बकोरीगाव, ता. हवेली, पुणे; मूळ उत्तर प्रदेश), सुरेंद्रपाल रामचंद्र पाल (वय 32, रा. बाराबंकी, उत्तर प्रदेश) आणि मोहम्मद शोएब वसीम खान (वय 37, रा. बाराबंकी, उत्तर प्रदेश) यांचा समावेश आहे. 5 ऑगस्ट रोजी रात्री साडेआठच्या सुमारास गावडेवाडी, शिरसवडी येथे पंडित गावडे यांच्या बंगल्यासमोर हा प्रकार घडला होता.

कारमधून घरी जाणार्‍या संतोष ज्ञानोबा गावडे यांना तीन अज्ञातांनी अडवून जीवे मारण्याच्या उद्देशाने गोळीबार केला. या हल्ल्यात ते गंभीर जखमी झाले. त्यानंतर आरोपींनी त्यांच्या गळ्यातील प्रत्येकी 11 तोळे वजनाच्या दोन सोनसाखळ्या, एकूण 22 तोळे व सुमारे 11 लाख रुपये किमतीचा ऐवज जबरदस्तीने हिसकावून मोटारसायकलीवरून पलायन केले होते.

याप्रकरणी लोणीकंद पोलीस ठाण्यात गुन्हा दाखल करण्यात आला होता. घटनास्थळी मिळालेल्या मोटारसायकलच्या आधारे पोलिसांनी तांत्रिक विश्लेषण तसेच गोपनीय माहितीच्या माध्यमातून तपासाला वेग दिला. पोलीस निरीक्षक संतोष सोनवणे, सहाय्यक पोलीस निरीक्षक मदन कांबळे आणि त्यांच्या पथकाने अवघ्या चार-पाच तासांत संशयित आरोपींची ओळख पटवली.

त्यानंतर आरोपींचा माग काढत पथक इंदूर येथे पोहोचले आणि तिघांना ताब्यात घेतले. पोलिसांच्या माहितीनुसार, मुख्य आरोपी अविनाश त्रिपाठी याच्यावर उत्तर प्रदेशात खून, खुनाचा प्रयत्न आणि दरोड्यासह सुमारे 20 गुन्हे दाखल आहेत. भारत आणि नेपाळमध्ये दरोड्यांच्या प्रकरणात तो पोलिसांना हवा होता. त्याच्या अटकेसाठी 50 हजार रुपयांचे बक्षीसही जाहीर करण्यात आले होते.

2018 मध्ये उत्तर प्रदेश विशेष कृती दलाने चकमकीनंतर त्याला लखनौ येथे अटक केली होती. आरोपी सुरेंद्रपाल पाल याच्याविरुद्ध उत्तर प्रदेशात चोरी व लुटीचे 12 ते 13 गुन्हे, तर मोहम्मद शोएब खान याच्याविरुद्ध पाच गुन्हे दाखल असल्याची माहिती पोलिसांनी दिली. दरम्यान, या गुन्ह्यात लुटण्यात आलेला ऐवज तसेच गुन्ह्यात वापरण्यात आलेले अग्निशस्त्र याबाबत पुढील तपास सुरू आहे.