French Museum : फ्रान्सची राजधानी पॅरिस येथील जगप्रसिद्ध ‘लूव्र म्युझियम’मध्ये रविवारी सकाळी ९ वाजता मोठ्या चोरीची घटना घडली. फ्रान्सच्या संस्कृती मंत्री रशीदा दाती यांनी सांगितले की, काही चोर म्युझियममधून मौल्यवान दागिने घेऊन फरार झाले. त्यांनी X (ट्विटर) वर लिहिले, “आज सकाळी लूव्र म्युझियम उघडताच चोरीची घटना घडली.” ही घटना जगातील सर्वात मोठ्या आणि सुरक्षायुक्त संग्रहालयांपैकी एका ठिकाणी घडल्याने खळबळ उडाली आहे.

फक्त ७ मिनिटांत झाली चोरी :

माध्यमांच्या अहवालानुसार, व्यावसायिक चोरांनी म्युझियमची भिंत ओलांडून आत प्रवेश केला आणि डिस्क कटरच्या साहाय्याने खिडकी कापून केवळ ७ मिनिटांत चोरी पूर्ण केली. त्यांनी नेपोलियन आणि महाराणी जोसेफिन यांच्या संग्रहातील ८ मौल्यवान दागिने चोरून नेले.

चोरीस गेलेल्या दागिन्यांमध्ये १८५५ मध्ये बनवलेला ऐतिहासिक यूजनी क्राउन (Eugénie Crown) देखील होता, जो हजारो मौल्यवान रत्नांनी सजवलेला आहे. पोलिसांना या ताजाचे काही तुकडे तुटलेल्या अवस्थेत सापडले असून, चोरीदरम्यान तो पडल्याची शक्यता व्यक्त केली जात आहे. हे दागिने फ्रान्सच्या गौरवशाली इतिहासाचे प्रतीक मानले जातात.

काय गायब झाले?

– पन्ना आणि हिऱ्यांची माळ,

– दोन मुकुट,

– दोन ब्रोच,

– एक नीलमाची माळ

– आणि एक झुमका (कानातले)

चित्रपटसृष्टीला साजेशी चोरी :

ही घटना रविवारी सकाळी ९:३४ वाजता घडली. दोन चोरट्यांनी पिवळ्या जॅकेटमध्ये अपोलो गॅलरीत प्रवेश केला आणि फक्त ७ मिनिटांत सर्व मौल्यवान दागिने उचलून मोटारबाईकवरून पसार झाले.

पॅरिसचे अभियोक्ता लॉरे बेक्यू यांच्या मते, चार जणांच्या टोळीने दोन-दोन गटांत विभागून चोरी केली. दोघे जण चेरी पिकर ट्रकमधून आत गेले, तर इतर दोघे मोटारबाईकवरून पळून गेले. या घटनेची रचना लोकप्रिय फ्रेंच टीव्ही सिरीज “ल्यूपिन” मधील एका चोरीच्या दृश्यासारखी असल्याचे लोक म्हणत आहेत.

शाही वारसा लंपास :

नेपोलियन तृतीयने सम्राज्ञी यूजिनीला दिलेला २,००० हिरे आणि २०० मोत्यांनी सजलेला मुकुट,

नेपोलियन बोनापार्टने मेरी-लुईससाठी दिलेली पन्ना आणि १,००० हिरे असलेली माळ,

तसेच राणी मेरी-अमेली हिचा नीलम–हिरा हेडपीस

चोरांनी मात्र एक १,३५४ हिरे आणि ५६ पन्ने असलेला पण नुकसानग्रस्त मुकुट तसाच सोडून दिला.

कधीच न सापडणारा वारसा?

कला आणि रत्नतज्ज्ञांच्या मते, या दागिन्यांचा शोध लागणे अत्यंत कठीण आहे. ७७ डायमंड्स कंपनीचे टोबियास कोर्मिंड यांनी सांगितले, “चोर हे दागिने तोडून वेगवेगळ्या भागात विकू शकतात, त्यामुळे हे रत्न इतिहासातून कायमचे अदृश्य होऊ शकतात.” तसेच डच कला तज्ञ आर्थर ब्रँड यांनी सांगितले की, “हे दागिने इतके प्रसिद्ध आहेत की त्यांना उघडपणे विकणे जवळपास अशक्य आहे.”

सुरक्षा व्यवस्थेवर प्रश्नचिन्ह :

लूव्र संग्रहालयात यापूर्वीही चोरीच्या घटना घडल्या आहेत. २०२४ मध्ये मोना लिसा पेंटिंगवर सूप फेकण्याची घटना घडली होती, तर याच वर्षी जूनमध्ये कर्मचाऱ्यांच्या संपामुळे संग्रहालय बंद ठेवावे लागले होते.