लखनौ : होळीच्या अगदी आधी, बुधवारी उत्तर प्रदेशचे मुख्यमंत्री योगी आदित्यनाथ यांनी प्रधानमंत्री उज्ज्वला योजनेअंतर्गत राज्यातील १.८६ कोटी पात्र कुटुंबांना गॅस सिलेंडर रिफिलसाठी १८९० कोटी रुपयांचे अनुदान वाटप केले. लखनौमधील लोकभवन सभागृहात बटण दाबून मुख्यमंत्री योगी यांनी ही योजना सुरू केली.

मुख्यमंत्री म्हणाले की, पूर्वी गॅस कनेक्शनसाठी लाच द्यावी लागत होती, तर आता ही सुविधा देशातील १० कोटी कुटुंबांना मोफत उपलब्ध करून देण्यात आली आहे. यासोबतच होळी आणि दिवाळीला गॅस सिलिंडरही मोफत दिले जात आहेत. यावेळी होळी आणि रमजान एकत्र असल्याने सर्व लोकांना या योजनेचा लाभ मिळेल, असे त्यांनी सांगितले.

मुख्यमंत्री योगी यांनी सांगितले की, उज्ज्वला योजना २०१६ मध्ये सुरू करण्यात आली होती. त्याअंतर्गत देशभरातील १० कोटी कुटुंबांना मोफत एलपीजी कनेक्शन मिळाले. उत्तर प्रदेशातील सुमारे २ कोटी लोकांना या योजनेचा फायदा झाला आहे. २०२१ मध्ये आम्ही आश्वासन दिले होते की, जर आम्ही २०२२ मध्ये सरकार स्थापन केले तर होळी आणि दिवाळीला मोफत गॅस सिलिंडर दिले जातील.

तेव्हापासून ही योजना दरवर्षी सुरू आहे. यावेळी होळी आणि रमजान दोन्ही एकत्र आहेत, त्यामुळे सर्वांना त्याचा फायदा होईल. उज्ज्वला योजनेसाठी ज्यांनी अद्याप नोंदणी केलेली नाही, त्यांनी नोंदणी करावी, असे आवाहन मुख्यमंत्र्यांनी केले. त्यांनी सर्वांना होळी शांततेत साजरी करण्याचे आवाहन केले.