नवी दिल्ली : केंद्र सरकार नवरात्री दरम्यान प्रधानमंत्री उज्ज्वला योजनेअंतर्गत (पीएमयूवाय) 25 लाख मोफत एलपीजी कनेक्शन वितरित करणार आहे. यामुळे देशभरातील उज्ज्वला लाभार्थ्यांची एकूण संख्या 10.6 कोटी होईल, अशी माहिती पेट्रोलियम आणि नैसर्गिक वायू मंत्री हरदीप पुरी यांनी दिली.

हरदीप पुरी म्‍हणाले, केंद्र सरकार प्रत्येक कनेक्शनवर 2,050 रुपये खर्च करेल. ज्यामध्ये एक मोफत एलपीजी सिलेंडर, गॅस स्टोव्ह, रेग्युलेटर आणि इतर संबंधित उपकरणे समाविष्ट असतील. ही महिलांसाठी नवरात्रीची भेट आहे. उज्ज्वला योजनेचा विस्तार पंतप्रधान नरेंद्र मोदी यांच्या महिला शक्ती सन्मान वचनबद्धतेचे प्रतिबिंबित करतो.

पंतप्रधान मोदी देवी दुर्गाप्रमाणे महिलांचा आदर करतात. या निर्णयामुळे माता आणि बहिणींचा आदर आणि सक्षमीकरण करण्याचा आपला संकल्प आणखी दृढ होतो, असे त्यांनी इंस्टाग्रामवरील पोस्टमध्ये लिहिले.