Satara: शाहूपुरी पोलिसांच्या गुन्हे प्रकटीकरण शाखेने तीन चोरट्यांच्या मुसक्या आवळत चार मोटारसायकल चोरीचे गुन्हे उघडकीस आणले आहेत. तिघा संशयित आरोपींना ताब्यात घेऊन त्यांच्याकडील चोरीच्या चार मोटारसायकली आणि गुन्ह्यात वापरलेली रिक्षा असा एकूण 3 लाख 85 हजार रुपयांचा मुद्देमाल जप्त करण्यात आला आहे.

या कारवाईत जगदीश दत्तात्रय दळवी (वय 19, रा. म्हाते, ता. जावळी), विक्रम शिवाजी भांडवलकर (वय 21, रा. ठाकुरकी, ता. फलटण) आणि गौरव आनंदा कदम (वय 22, रा. मालचौडी, ता. जावळी) या संशयितांना ताब्यात घेण्यात आले आहे.

शाहूपुरी पोलीस ठाण्यात दि. 30 ऑगस्ट रोजी मोटारसायकल चोरीची तक्रार दाखल झाली होती. त्यानुसार गुन्हा दाखल करण्यात आला होता. मोटारसायकल चोरीच्या वाढत्या घटनांची गंभीर दखल घेत पोलीस अधीक्षक निखिल पिंगळे, अपर पोलीस अधीक्षक वैशाली कडुकर आणि उपविभागीय पोलीस अधिकारी विपुल पाटील यांनी पोलीस निरीक्षक संग्राम शेवाळे यांना गुन्हा उघडकीस आणण्याच्या सूचना दिल्या. त्यानुसार गुन्हे प्रकटीकरण शाखेचे पथक चोरट्यांच्या मागावर होते. दि. 18 सप्टेंबर रोजी पोलिसांना मिळालेल्या गोपनीय माहितीच्या आधारे मोळाचा ओढा परिसरात राजपुरोहित बेकरीसमोर मोटारसायकलीसह थांबलेल्या जगदीश दळवी याला ताब्यात घेण्यात आले.

सुरुवातीला त्याने पोलिसांना उडवाउडवीची उत्तरे दिली. मात्र पोलिसांनी कसून चौकशी केल्यानंतर त्याने मोटारसायकल चोरीची कबुली देत चोरीत आणखी एक साथीदार असल्याची माहिती दिली. यानंतर पोलिसांनी बसस्थानक परिसरात शोध घेत विक्रम भांडवलकर याला ताब्यात घेतले. चौकशीत त्याने शाहूपुरी पोलीस ठाण्याच्या हद्दीतून दोन, तर मेढा पोलीस ठाण्याच्या हद्दीतून दोन अशा चार मोटारसायकली चोरी केल्याची माहिती दिली. पोलीस हवालदार मनोज मदने तपास करीत आहेत.

पोलीस अधीक्षक निखिल पिंगळे, अपर पोलीस अधीक्षक वैशाली कडुकर, उपविभागीय पोलीस अधिकारी विपुल पाटील, पोलीस निरीक्षक संग्राम शेवाळे यांच्या मार्गदर्शनाखाली सहायक पोलीस निरीक्षक प्रियांका बाबर, पोलीस उपनिरीक्षक शैलेंद्र गोवेकर यांच्या नेतृत्वाखाली गुन्हे प्रकटीकरण शाखेने ही कारवाई केली. सुरेश घोडके, मनोज मदने, निलेश काटकर, ज्योतिराम पवार, महेश बनकर, अभय साबळे, सचिन पवार, स्वप्निल सावंत, सुमित मोरे, संग्राम फडतरे, विशाल धुमाळ आणि रोहित बाजारे यांनी कारवाईत सहभाग घेतला.