Shiv Sena Leader : शिवसेनेचे कल्याण पूर्व विधानसभा संघटक प्रशांत काळे यांचे मंगळवारी (१४ ऑक्टोबर) सायंकाळी उपचारादरम्यान निधन झाले. ते ५० वर्षांचे होते. गेल्या सुमारे १६ महिन्यांपासून ते आजाराशी झुंज देत होते. त्यांच्या निधनाने कल्याण-डोंबिवलीतील राजकीय आणि सामाजिक क्षेत्रात शोककळा पसरली आहे. (Shiv Sena Leader)

१६ महिन्यांपासून सुरू होते उपचार

मिळालेल्या माहितीनुसार, प्रशांत काळे यांना ब्रेन हॅमरेज झाल्यानंतर ठाण्यातील खासगी रुग्णालयात दाखल करण्यात आले होते. त्यानंतर कल्याणमधील एका खासगी रुग्णालयात त्यांच्यावर उपचार सुरू होते. उपचारादरम्यान ते कोमात होते. (Shiv Sena Leader)

मंगळवारी त्यांची प्रकृती खालावली आणि उपचार सुरू असतानाच त्यांची प्राणज्योत मालवली. त्यांच्या पश्चात पत्नी आणि दोन मुले असा परिवार आहे. त्यांच्या पत्नी माधुरी काळे या कल्याण-डोंबिवली महानगरपालिकेच्या नगरसेविका आहेत. (Shiv Sena Leader)

काँग्रेसपासून सुरू झाला राजकीय प्रवास

प्रशांत काळे यांनी आपल्या राजकीय कारकिर्दीची सुरुवात काँग्रेस पक्षातून केली होती. त्यानंतर त्यांनी राष्ट्रवादी काँग्रेसमध्येही काम केले. पुढे शिवसेनेत सक्रिय होत त्यांनी एकनाथ शिंदे यांच्या नेतृत्वाखालील शिवसेनेत कल्याण पूर्व विधानसभा संघटक म्हणून जबाबदारी सांभाळली. (Shiv Sena Leader)

मनमिळाऊ स्वभाव, कार्यकर्त्यांशी असलेले जिव्हाळ्याचे संबंध आणि जनसंपर्क यांमुळे कल्याण-डोंबिवली परिसरात त्यांची वेगळी ओळख निर्माण झाली होती. राजकीय कार्यासोबतच सामाजिक क्षेत्रातही त्यांनी योगदान दिले होते. (Shiv Sena Leader)

श्रीकांत शिंदेंसह मान्यवरांकडून श्रद्धांजली

प्रशांत काळे यांच्या निधनाची बातमी समजताच राजकीय पदाधिकारी, कार्यकर्ते, नगरसेवक आणि विविध क्षेत्रांतील मान्यवरांनी शोक व्यक्त केला. कल्याणचे खासदार डॉ. श्रीकांत शिंदे यांच्यासह अनेकांनी त्यांच्या पार्थिवाचे अंत्यदर्शन घेत श्रद्धांजली अर्पण केली. (Shiv Sena Leader)

सातारा जिल्ह्यातील पाटण तालुक्यात असलेल्या त्यांच्या मूळ गावी, सोन्याची वाडी येथे त्यांच्या पार्थिवावर अंत्यसंस्कार करण्यात आले. त्यांच्या निधनामुळे काळे कुटुंबावर दुःखाचा डोंगर कोसळला असून, त्यांच्या जाण्याने राजकीय आणि सामाजिक क्षेत्रातून हळहळ व्यक्त केली जात आहे. (Shiv Sena Leader)