पुणे : सावित्रीबाई फुले पुणे विद्यापीठाने फिनलँडच्या टुर्कू विद्यापीठाशी अध्यापन व संशोधन, विद्यार्थी व अध्यापक आदानप्रदान, संयुक्त आंतरराष्ट्रीय प्रकल्प, कमी कालावधीचे प्रशिक्षण कार्यक्रम तसेच, अभ्यासक्रम विकसित करण्यासंबंधी सहकार्य करण्याचे ठरवले असून, त्याबाबतच्या सहमती पत्रावर दोन्ही विद्यापीठांकडून स्वाक्षऱ्या करण्यात आल्या.

फिनलँड हा देश आधुनिक शिक्षणपद्धतीसाठी जगप्रसिद्ध आहे. टुर्कू विद्यापीठ हे या देशाच्या नैर्ऋत्य भागात स्थित आहे. ते सुमारे १०० वर्षे जुने विद्यापीठ आहे. टुर्कू हे फिनलँडमधील आघाडीचे विद्यापीठ असून, विविधशाखीय दर्जेदार संशोधनासाठी ओळखले जाते. या विद्यापीठाच्या शिष्ठमंडळाने गेल्या वर्षी सावित्रीबाई फुले पुणे विद्यापीठाला भेट दिली होती. त्या वेळी त्यांनी अध्यापन व संशोधन या क्षेत्रांत संयुक्त उपक्रम राबविण्याची इच्छा व्यक्त केली होती.

विद्यापीठ अनुदान आयोगाची (यूजीसी) शैक्षणिक व संशोधनातील भागीदारीला प्रोत्साहन देण्यासाठी ‘स्पार्क’ नावाची योजना आहे. त्याअंतर्गत सावित्रीबाई फुले पुणे विद्यापीठ आणि टुर्कू विद्यापीठ यांच्यात बायोसायन्सेस विषयात संशोधन सुरू आहे. याशिवाय सावित्रीबाई फुले पुणे विद्यापीठाचे काही विद्यार्थी टुर्कू विद्यापीठात पीएचडी किंवा पीएचडीनंतरचे संशोधन करत आहेत.

या पार्श्वभूमीवर, टुर्कू विद्यापीठाचे वाईस-रेक्टर प्रा. काले-अन्ती सुओमिनेन यांच्या नेतृत्वाखालील शिष्टमंडळाने विद्यापीठाला भेट दिली. त्यात सहकार्याबाबत सहमती पत्रावर स्वाक्षऱ्या करण्यात आल्या. सावित्रीबाई फुले पुणे विद्यापीठाच्या वतीने कुलगुरू प्रा. (डॉ.) नितीन करमळकर यांनी स्वाक्षरी केली.

संयुक्त कार्यक्रमाचे फायदे :
१. विद्यार्थी आदान-प्रदान उपक्रमांतर्गत सावित्रीबाई फुले पुणे विद्यापीठाच्या विद्यार्थ्यांना संशोधनाच्या संधी उपलब्ध होतील.
२. सावित्रीबाई फुले पुणे विद्यापीठ आणि टुर्कू विद्यापीठ मिळून युरोपीय युनियन व तत्सव संस्था / संघटनांकडून निधी मिळवण्यासाठी संयुक्त प्रस्ताव दाखल करू शकतील.
३. केंद्रीय मनुष्यबळ विकास मंत्रालयाच्या नव्या शिक्षण धोरणांतर्गत सुरू करावयाच्या नवनवीन अभ्यासक्रमांची रचना करण्यास उपयोग होईल.