Sam Pitroda Controversy : इंडियन ओव्हरसीज काँग्रेसचे प्रमुख सॅम पित्रोदा यांनी शुक्रवारी एका मुलाखतीत केलेल्या वक्तव्याने नव्या वादाला तोंड फोडले आहे. “पाकिस्तानात मला घरी असल्यासारखे वाटले,” असे वक्तव्य त्यांनी आयएएनएस या वृत्तसंस्थेशी बोलताना केले. यासोबतच त्यांनी भारताच्या परराष्ट्र धोरणाने शेजारी देशांवर लक्ष केंद्रित करावे, असेही मत मांडले.

“भारताच्या परराष्ट्र धोरणाने प्रथम आपल्या शेजारी देशांवर लक्ष द्यावे. हे देश छोटे आहेत, त्यांना मदतीची गरज आहे, आणि त्यांच्यासोबत संघर्षाची गरज नाही. अर्थात, दहशतवाद आणि हिंसाचाराचा प्रश्न आहे, पण शेवटी या शेजारी देशांमध्ये एक सामायिक जनुकीय समानता आहे. मी स्वतः पाकिस्तानात गेलो होतो, आणि मला तिथे घरी असल्यासारखे वाटले,” असे पित्रोदा म्हणाले.

Watch: Indian Overseas Congress chief Sam Pitroda says, “Our foreign policy, according to me, must first focus on our neighbourhood. Can we really substantially improve relationships with our neighbours?… I’ve been to Pakistan, and I must tell you, I felt at home. I’ve been to… pic.twitter.com/DINq138mvW

— IANS (@ians_india) September 19, 2025

याशिवाय, पित्रोदा यांनी देशातील तरुणांना काँग्रेस नेते राहुल गांधी यांच्या समर्थनार्थ पुढे येण्याचे आवाहन केले. “मी फक्त एवढेच सांगेन की, देशातील तरुणांनी राहुल गांधी यांच्या आवाजाला आपला पाठिंबा द्यावा,” असे त्यांनी नमूद केले.

भाजपचा संताप –

पित्रोदा यांच्या या वक्तव्यानंतर भारतीय जनता पक्षाने (भाजपा) त्यांच्यावर आणि काँग्रेसवर जोरदार टीका केली आहे. भाजपाचे प्रवक्ते प्रदीप भंडारी म्हणाले, “राहुल गांधी यांचे निकटवर्तीय आणि काँग्रेस ओव्हरसीजचे प्रमुख सॅम पित्रोदा म्हणतात की, त्यांना पाकिस्तानात ‘घरी’ असल्यासारखे वाटले.  UPA सरकारने २६/११ च्या दहशतवादी हल्ल्यानंतरही पाकिस्तानविरुद्ध कठोर कारवाई का केली नाही, याचे आश्चर्य वाटत नाही. पाकिस्तानचा लाडका, काँग्रेसचा निवडलेला!”

Watch: On Lok Sabha LoP Rahul Gandhi’s appeal for Gen Z to step forward and protect democracy in India, Indian Overseas Congress chief Sam Pitroda says, “All I would do at this stage is I would request the youth of India to add their voice to the lone voice of Rahul Gandhi” pic.twitter.com/msmT1wrz6t

— IANS (@ians_india) September 19, 2025

यापूर्वीही वादग्रस्त वक्तव्य-

ही पहिलीच वेळ नाही की पित्रोदा यांच्या वक्तव्याने वाद निर्माण केला आहे. यापूर्वी फेब्रुवारी २०२५ मध्ये त्यांनी चीनबाबत केलेल्या वक्तव्यानेही राजकीय वादळ उठले होते. त्यावेळी त्यांनी, “चीनकडून येणारा धोका अतिशयोक्तीपूर्ण आहे,” असे म्हटले होते. आयएएनएसला दिलेल्या मुलाखतीत त्यांनी भारताच्या चीनबाबतच्या दृष्टिकोनात बदलाची गरज असल्याचे सांगितले होते. “आपला दृष्टिकोन सुरुवातीपासूनच टकरावाचा आहे. हा दृष्टिकोनच शत्रू निर्माण करतो. आपण चीनला सुरुवातीपासून शत्रू मानण्याची गरज नाही,” असे त्यांचे म्हणणे होते. काँग्रेसने मात्र या वक्तव्यापासून स्वतःला दूर ठेवले होते.

राहुल गांधी यांचे निकटवर्तीय सहकारी असलेले सॅम पित्रोदा यांच्या या ताज्या वक्तव्याने पुन्हा एकदा राजकीय चर्चांना उधाण आले आहे.